與陶才子吃飯，聽佢評介時事，笑刺肚皮，因為佢說話之時，板起面孔，但說話內容詼諧百出，都唔知佢係認真吖，還是怪論，總之娛樂性極為豐富。譬如「香港機場管理局」上市，雖然十畫未有一撇，重要搞一兩年手續，但係我哋一班人講到，他日上市，冇理由仍然繼續叫做「香港機場管理局」㗎，應該改番一個壓得住嘅名稱。陶才子話：日本人叫機場做空港，例如成田空港，香港人崇拜日本，我哋可以有個「香港空港」，但空空聲，或者匈匈聲，廣東話唔好聽，不如從俗叫做「香港吉港」，夠晒大吉大利，萬事皆吉！
我哋笑到唔識出聲，按此辦法，既然ANA叫做「全日空」，國泰航空不如改為「國泰吉」，吉吉利利，唔會再發生747飛機自洛杉磯起飛引擎出火，上演一幕空中驚魂。左丁山喺二○○一年九月，九一一之後，坐國泰機去洛杉磯，自赤鱲角起飛不久，就見到引擎失火，全機乘客嚇到面青，飛機在南中國海上空盤旋近兩小時放汽油，放得八八九九先至飛返嚟緊急着陸。左丁山喺嗰兩小時，諗住生死有命，幾乎寫遺囑，後來一諗，如果飛機唔掂，份遺囑都會不知所終，寫嚟做乜吖。國泰嘅生意好到冇得頂，日日爆滿，真係希望佢吉吉利利㗎，叫做「國泰吉」唔會差得去邊。
有人提醒陶才子，美國紐約JFKAirport全球皆識，台灣又有ChiangKaiShekInternationalAirport（可能將來改為阿扁機場），香港不如循此例，將機場紀念第一個管治特區十年嘅特首，就叫做TungCheeHwaInt'lAirport啦！嘩，此議一出，好多人幾乎食唔落飯，又有人話，應該尊重國家領袖，機場由江澤民開幕，不如叫做JiangZeMinInt'lAirport，簡稱JZM，英文縮寫唔夠口響喎，外國人唔識字，叫ZeMin為Jimmy，或可以叫做JimmyJiangInt'lAirport，簡稱JJ，好聽兼順口，鬼佬喺JJ落機，就會去君悅JJ消遣，直情係旅遊服務一條龍。