西九龍事必成為地產商的晚餐，政府賤賣土地益闊佬大財團，連掩眼法也懶做，擺明搵市民老襯，當你係茂里。勞氣都無謂，不如主動幫地產商諗定一個樓盤好名，費事一再被甚麼君臨天下嚇你一驚。（噢，除非你特別喜歡L君，就另當別論。）
報章為求省事，已經將項目簡化稱為「西九」，又西又九像粗口，當然唔合闊客買家心水。為了配合西九根本冇乜的文藝氣息，樓盤最好拉上補下，緊貼小說潮流，叫做DaVinciCourt，借達文西過橋，肯定不必付版權費。
西九是九龍市中心地王，靚景無敵，買家坐擁金勞式豪華文藝海景，感覺十足九五之尊，是以叫做「西九龍皇帝」最應景。如果買家姓曾，九五折優待又點話。（曾蔭權帶頭睇樓，可以考慮給他頭籌。）
四個字的樓盤曝光過度已經了無新意，不妨創新格局，來個水蛇春的「西九龍文化重地之天幕傳奇」。試諗吓，回家路上跟的士司機這樣說，是多麼的與別不同，出入頓覺高人一等，威盡九龍。
假如覺得長名太搞作，驚住有銀富婆不耐煩，也可以考慮兩個字的。最佳示範是近期夠晒hit的「家國」。到時「家國」有數得計，單位斷呎交易，均真踏實，唔使再拗甚麼才是愛國。要示愛嗎？還等甚麼，入市啦老友。愛國創新高固然好，愛國摸頂追貨理所當然。愛國愛到轉手也不太壞，至緊要別愛國撻訂或者釘契就得。「家國」咁貴，曾司長應該可以保證，永遠不會爆屎渠。