Rock友玩復刻版SideCar超激改

Rock友玩復刻版SideCar超激改

擁有SideCar嘅三輪電單車長江CJ750B,外形經典夠出眾,而且可以載多一個人載多好多嘢,聽起上嚟好吸引。不過呢架經典國產軍車扭盡極速只有約80km/h,孭住架SideCar,高速劈彎更加唔使諗,六萬幾蚊車價值唔值呢?「值!架車咁經典咁特別,揸咁快做乜!」,的確,勁Rock嘅車主富仔配埋呢架夠晒張揚嘅SideCar電單車喺鬧市巡遊,收視率定必比那些幾百萬超級跑車更高,咁樣相比之下真係抵好多喎!
記者:馬慶武
攝影:林栢鈞

銀器裝身DIY
「阿富仔,篇報道裏面出你真名定抑話英文名好呢?」「我無英文名,叫我『死神』啦!」,嘩!使唔使Rock得咁徹底呀?阿「死神」一身HeavyMetal打扮,紋晒身穿晒環,個Look超激,同佢改到面目全非嘅舊愛KawasakiVulcan400及新歡長江CJ750B可謂襯到絕。
「我主要都係改裝架車嘅外觀,有好多電鍍配件都係自己設計再喺大陸搵廠做,可以話係獨一無二。」
死神係「利時」一間銀器店嘅老闆,因利成便DIY咗好多獨特配件。好似電鍍鷹頭、大銀鏈,本身都唔係電單車專用配件,但死神都將佢哋加晒上車,總知就要令到架車變成道路上嘅焦點。

■老實講富仔一身HeavyMetal有啲惡形惡相,傾落先知個人好Nice。

有私家車都唔想揸
眼見死神架Vulcan改得咁勁,相比下長江嘅外觀好似太齋喎!原來死神上兩個月俾人扣晒分要停牌三個月,所以等停牌期滿等到頸都長。
「架車揸咗唔夠半年,比人扣晒分,本來有勁多嘢想改,不過𠵱家唔揸得咩都停晒先,惟有停完牌再勁改……我好鍾意揸住架電單車周圍去,揸電單車嘅感覺好自由,屋企有私家車都唔係咁想揸。」

長江CJ750B富仔得意之作

■此車設有後波,不過就足有兩部大型電單車咁闊,最少要兩個排骨位先泊得落。

復古鉸位
■牛角鉸位和現代車款調轉,係復古車嘅標記。

紋布客座
■Seat位拉上銀底動物紋布,襯晒富仔嘅野性形象。



高速左轉玩甩尾
講番長江CJ750B嘅性能,死神話呢部車極速只有約80km/h,而且加埋SideCar重量,起步加速絕對稱唔上強勁。轉向方面,因為要遷就左邊嘅SideCar,「瞓彎」唔使諗,SideCar空載時,轉右彎更要特別慢,否則SideCar隨時離地,不過死神話呢架車最好玩唔係SideCar離地,而係以較高速轉左彎時可以玩甩尾。
「得閒喺停車場玩吓就無所謂,喺街度單輪離地好危險……但我試過扭左軚急停,成架車打左半個白鴿轉,如果旁邊無車,咁樣泊車你都咪話唔型!」

一身懷舊軍Look

車頭大鷹
■SideCar車頭的電鍍裝飾及大鷹,係富仔DIY加裝上去嘅。

電鍍燈罩
■SideCar部份同樣設有煞車燈,而電鍍燈罩當然又係富仔嘅傑作啦!

仿寶馬偈
■長江呢副水平對向引擎勁有寶馬Feel,全因為CJ750B當年係參照寶馬嘅R71電單車製造。

■設於頭燈上嘅速度表板顯示極速160km/h,但富仔話實際扭到盡都係80km/hr。

■下方加裝咗兩盞大霧燈,增加晚間行車嘅安全性。

■連車胎都係中國製造,其中一條胎已經俾富仔玩甩尾玩到爆咗!

坐SideCar3大Tips
1﹒乘客唔使戴頭盔
SideCar電單車可以載乘客,而且根據本港交通條例374F章3.1及3.2條,乘坐附加側車嘅乘客可以豁免戴上頭盔,亦沒有規定好像一般電單車般後座乘客必須年滿8歲才可乘搭。

2﹒電單車牌已包括三輪車牌
只要考獲電單車牌,便等於擁有22號「機動3輪車牌」,可駕駛設有SideCar的電單車。

3﹒牌費、第三者保費與巡航車相若
據車主富仔說,這輛長江電單車的牌費及第三者保費,和其他750cc電單車相若。

■引擎後方呢支棍仔係泊車手掣,不過富仔話拉起後其實同入咗一波無分別。

長江CJ750BProfile
引擎:750cc四衝風冷OHV水平對向雙汽缸
馬力:30ps/4,000rpm
傳動:4前速棍波
制動:鼓式
尺碼:2400×1730×1000mm
軸距:1444mm
車重:410kg
油缸容量:24公升
輪胎:3.75/19
懸掛:(前)正立套筒避震(後)三角搖臂加套筒式避震(Sidecar為葉片彈簧)
車價:約$68,000
查詢:合平有限公司(26565552)


KawasakiVulean400勝在夠誇張

掛羊頭
■車尾連羊頭都有個,絕對超級誇張。

■好似導彈咁款嘅尾喉及超巨型側皮袋,係富仔為愛車特別訂製。

■富仔第一架擁有嘅電單車就係KawasakiVulcan400,用咗四五萬蚊改到面目全非。

■富仔係銀器店老闆,牛角骷髏骨頭盔及氧氣罩等都係箇中超激配件。