油價續跌，經濟數據優於預期，支持美股再升。滙控（005）ADR好靚仔，高收87.82美元，約合滙控每股136.6元左右，港股今日高開機會甚大，話唔定試闖萬四關。
倉內3隻大藍籌，暫時任佢放，且待恒指9RSI去到80樓上（目前在75水平），先至考慮去或留。其餘幾隻股份，按策略持有。
趙飛雲本周會先留意兩隻股份，第1隻係駿威（203）。駿威股價今年4月見頂，兩個月間由4.9元直插2.55元，箇中原因大家都知，就係內地汽車市場競爭白熱化，恐怕車廠會割價搶客，搞到利潤薄如紙。
內地汽車市場打崩頭，確係事實，但駿威股價經過大跌後，應已反映。趙飛雲重知道3個事實：第1，駿威旗下廣州本田所產的雅閣，至今仍未減價；第2，廣本10月份產銷比率達98%，即係每產100輪轎車，就賣出98輛，存貨極少；第3，最近宣布於增城建新廠，06年可投產，屆時產能將增5成。
從技術上分析，駿威橫行5個多月後，周線圖RSI同STC均現牛背馳，日線圖上股價亦重返50日線之上，MACD快發出雙牛訊號，走勢已轉佳，現價買入，第1個目標看橫行區頂部3.2元。
第2隻係中芯（981）。納指近期大勇，晶片股好番，對中芯有利。股價近個半月營造三角形，上周五升破降軌阻力，3條平均線向好排列，走勢明顯轉強，現價買入，上望2元。
趙飛雲