熱門屋苑交投活躍，原來舊區單幢樓其實一樣有人搶，有啲冷門到可能連樓盤名都未聽過。
北角嘉洋大廈中層C單位，四百六十六呎，剛以一百六十五萬易手，每呎三千五。個盤喺和富道二至八號，隔籬係城市花園及莊士維港軒，樓齡十八年，共有六十九個單位。美聯龔彥峰話，原業主四月用一百四十五萬購入，獲利二十萬。買家係內地廠家，諗住等內地好友與拍檔嚟香港時有地方住。
另外灣仔基華樓中層九百呎單位，望維港煙花景，放盤一粒鐘，就火速賣出，成交價二百零八萬，每呎二千三。基華樓位於告士打道二一九至二二○號，三十七年樓，全幢都係得三十三伙。美聯王鑫灝話，買家計劃長線投資。
重有銅鑼灣怡安大廈中層C，六百三十呎，以二百一十八萬沽出，每呎近三千五。隔籬嘅置安大廈高層M室，五百五呎，成交價一百八十二萬，每呎三千三。兩盤位於東角道，毗鄰崇光百貨，怡安大廈有二百零四伙，置安則有二百零六伙，兩盤樓齡同為三十二年。
西九龍文娛藝術區又再成為市場話題，蘭西聽聞，香港大學早前就呢個項目，做民意調查，收集市民意見。港大點解要做呢個調查，結果會唔會影響政府批出發展權呢？
問卷分兩部份，先係評價文藝狀況，例如香港喺呢方面做成點，同其他城市比較點睇。
第二部份係對西九龍文娛藝術區嘅意見，有啲問題都幾尖銳，好似覺得呢個項目對香港文藝發展有幾大幫助；未來經營應該由納稅人、定係發展商畀錢；若果唔使畀地價，項目會賺定蝕？
其他重有對經營文娛設施嘅財政問題、地產比例，以及會否俾財團壟斷等。
恒基四叔（主席李兆基）做事一向鍾意親力親為，成日會趁假期去視察吓啲新盤。噚日就有代理見到，四叔下晝三點幾，去咗大角嘴港灣豪庭巡視。
其實，港灣豪庭開賣咗咁耐，已經唔係乜嘢焦點新盤，四叔得閒都要落去睇吓，真係好魄力。
噚日假期，除咗四叔咁勤力之外，另一個市場焦點盤，剛剛開放示範單位嘅廣生行荃灣樂悠居，發展商高層更加要實地考察，了解吓氣氛有幾熱鬧。所以華人置業大股東劉鑾雄，下晝都去咗樂悠居巡視一番。
低調嘅舖市孖寶兄弟張照充、張樹充，委託中記標售觀塘輔仁街八十三至八十五號地下I、J舖，意向價五千一百萬，四萬四蚊一呎，下月六日截標。
呢兩個舖有千一呎，去年買入價大約三千萬，現由七‧十一便利店和電訊盈科租用，租期分別到○七和○九年，租金合共十八萬三，若以五千一百萬成交，回報率四厘三，一年升值七成。
聽講，年過半百嘅張氏兄弟，係投資老手，港九新界都有舖收租，今年初炒過一轉通菜街九十三號地舖，唔夠一個月，就賺二百八十萬。
上個月樓市勁旺，買賣合約大部份會喺今個月送交註冊，頭十一日登記總值近一百七十三億，中原地產高級經理黃良昇估計，全月超過四百四十億元，係近六年單月新高。今年登記總值最高係三月，有四百零九億。
至於登記量，近五千二宗，預期全月可以有萬三宗，係今年第二高，比三月高位近萬四宗少啲啲。佢話，數據顯示，樓市已經出現第二個上升浪，同今年三月有得比。
電郵地址：
