由女仔講到男仔，由少女心事講到教仔心得，永遠魅力四射嘅陳方安生呢日嚟到窩打老道，喺濟濟一堂嘅和尚寺九龍華仁書院大禮堂裏面，大談「香港良心」嘅心事，有少女心事，又有苦口婆心。
少女時代嘅Anson係「聖女」一名——就讀嘉諾撒聖心書院，同香港華仁書院係隔籬鄰舍，一間係師姑庵，一間係和尚寺，學生妹學生哥自然要更加珍惜返學放學嘅happyhour。Anson四萬咁嘅口話，聖心妹對華仁仔嘅印象幾好，女同學見到華仁仔例必評頭品足一番，有華仁舊生問佢當時有冇𠝹番件華仁仔，佢就含蓄不語。
少女時代嘅Anson唔使諗當然青春爛漫，退休之後嘅前政務司司長陳方安生嘅風頭一樣咁勁。陳太家陣每個禮拜五都會返母校探望師妹，講下學問、講下哲理，但係唔知有冇教番兩道結識異性嘅散手過啲小師妹。
輔導中學生嘅桃李歲月令陳太感慨良多，佢發現家陣嘅學生好大壓力，壓力係來自父母，家長好捨得使錢畀子女返補習社，係又補，唔係又補，中英文歷史地理乜到補。陳太認為家長對子女期望太高，關懷就唔多夠，物質供應有餘，溝通傾談不足，佢嘅提議好簡單，就係食飯時候唔好睇電視，一路食飯一路傾下閒偈，兩代之間就會融洽了解得多。
（圖）陳方安生噚日喺九龍華仁書院大禮堂裏面講起當年睇男仔嘅趣事。梁祖彝攝
傳真︰2623-9278
電郵︰