美國加息，香港不加反減，有這樣出人意表的結果，最大的原因是香港銀行水浸。水浸，因為渠口塞了，水沒有路可走。為了要排水減少水浸，人人齊心出力。
一天，電話傳出一把甜美的聲音：「喂，唔該林生吖？」
不防有詐：「我係。」
甜美的聲音用了要扣五分的超速速度說：「林生，呢度係『出奇銀行』打嚟㗎，林生貴為我哋嘅信用卡客戶，我哋𠵱家特別為林生你，預備咗3萬蚊嘅信貸額，每月嘅利息係特別低嘅，如果你分一年還……」我硬cut：「對唔住，你係唔係即係叫我借錢啊？」
甜美的聲音有點緊張：「係啊，真係好抵㗎，只需要林生你喺電話度做確認，就即刻寄支票畀林生你……」我又硬cut：「Sorry啊，我諗我唔需要嘞。」
聲音不單甜美，更多了一份慈祥：「唔係喎，利息真係好平㗎，有成3萬蚊喎，你攞咗之後做乜都得啦……」
難得我現在處於財政穩健期，不用借錢度日那麼淒涼，所以我用帶有一點驕傲的聲音硬cut：「唔使嘞，我唔使借錢啊！」多自豪。
慈祥甜美的聲音突然多了一份執着：「唔係喎，呢3萬蚊可以用嚟找卡數喎，利息平過信用卡好多㗎，不如我𠵱家同你做登記吖……」
真奇怪，香港人好似有內置卡數，我們真的要和卡數一生相依？
我用君臨天下之聲說：「我唔使找卡數啊！所以我唔使借錢。」
敵方終於知難而退。但是我沒有為了香港銀行排洪而出力，我對不起香港千千萬萬的紅簿仔存戶。