肥彭愛將麥奇連（KerryMcGlynn）最近由澳洲返港，上周五（十一月十二日）喺堅道明愛天主教座堂為佢上月病逝嘅愛妻Jenny喺香港開追思彌撒，麥奇連嘅舊上司陳太、丘太以及政府新聞處嘅舊同事同老友都有出現，小小超亦都有嚟。
麥奇連係肥彭嘅發言人、新聞處出名嘅文膽，當年唔少高官嘅發言稿都係由佢操刀，佢前兩年退休返回澳洲，陪伴患上胃癌嘅愛妻，正如佢喺追思會上形容，太太係一個好勇敢、有愛心同有堅持嘅人，過去五年一直同病魔對抗，從不放棄。
麥奇連喺追思上不但回憶當年喺英國邂逅妻子嘅美好時光，以及呢段近四十年嘅婚姻，亦讀出肥彭嘅來信，肥彭話Kerry同Jenny，就好似ginandtonic，乃天作之合，佢同太太唔會忘記Jenny為香港兒童作出嘅貢獻，亦對Jenny以淡然嘅態度面對死亡、不屈不撓嘅精神致意。
麥奇連呢個星期就會飛返澳洲，同佢兩個女同三個孫一齊，八方喺度祝佢生活愉快。
傳真︰2623-9278
電郵︰