林保怡近日憑無綫劇集《金枝慾孽》中「孫白颺」一角人氣急升，在劇中獲群雌拱照的他，更是無綫台慶夜「我最喜愛的男主角」獎項的大熱。自信心爆棚的保怡看來並不把其他勁敵放在眼內，並說：「我攞硬獎！」
林保怡早年以歌手身份晉身娛樂圈，後來卻因拍劇廣為人認識，更成為師奶殺手，近日在《金枝慾孽》扮一演個多情御醫而贏盡收視口碑，還因唱劇集主題曲而再出唱片，順理成章躍登本周五（十九日）無綫台慶夜「我最喜愛的男主角」呼聲最高的人選。
問保怡怎樣看憑《棟篤神探》入圍的勁敵黃子華？他說：「我主演嘅《金枝慾孽》係一套女人戲，子華演嘅《棟》劇好似做番自己，我好有信心憑女人戲突圍而出，真係攞硬獎。不過，當然要配合天時、地利同人和，我發現《金》劇唔止喺香港hit，重喺內地、東南亞甚至全世界帶起熱潮。」
對於另一勁敵、憑劇集《隔世追兇》入圍的去屆「我最喜愛的男主角」得主郭晉安，保怡說：「佢舊年演嘅阿旺，真係畀佢好大發揮空間，如果舊年唔得獎，我就懷疑公司造馬，今年都係睇好自己。」有傳因為無綫力邀保怡簽經理人約，作為交換獎項的條件，保怡否認說：「我都未簽無綫，𠵱家經理人重係M8，現階段工作好忙，加上重未約滿，所以唔諗呢個問題住。」
保怡揚言奪獎後可證明其演藝事業可再攀另一高峯，他說：「《金》劇攞獎帶我去另一個階段，如果我真係得獎，我就會再幫自己計劃一吓，諗吓下一步要點做先啱自己。」
保怡回顧以往的角色，形容自己最初演戲時如一張白紙，隨着人生閱歷深了，演繹角色更淋漓盡致，他表示《金》劇是他第一套古裝劇，他說：「我演繹呢個角色純粹係用自己感覺去演，同埋同導演及對手溝通，好彩佢哋都好信我。」
保怡在劇集《妙手仁心》中演急症室醫生黎國柱，很多人均覺得該角色是為他度身訂做，他卻說：「完全唔係噃，角色人物淨係揸靚車同鍾意蒲吧呢點，已經同我個性好唔同，我份人好日都唔去酒吧一次，最鍾意黐家。」反而保怡指劇集《新鮮人》中的「方家輝」最似自己，因為該角色很喜歡幫人，他認為施比受更有福。
保怡表示將來有機會要回饋社會，他說：「我好希望可以用自己嘅知名度去幫到一啲病人，去畀鼓勵佢哋，等佢哋可以有勇氣戰勝病魔。而啲長者年輕時為社會出過好多力，我哋好應該尊重同關心佢哋。」
唱歌和演戲，如魚與熊掌，對保怡來說同樣難於取捨，不過他很享受做歌手站在舞台，讓台下歌迷專注聽他唱歌那份滿足感。問保怡最欣賞哪位歌手？他說：「我最欣賞陳奕迅，我有時揸車都成日哼佢啲歌。我亦好鍾意黃耀明，佢咁多年都好保持到自己嘅風格，絕唔會因為周遭情況而去改變，好藝術家。」
