力寶華潤（156）概念瓣數多，呢期個市已經升到近1年高位，隻股重喺近半年橫行底徘徊，現價抵搞。
力華有喺馬交經營銀行業，04年中期（6月止），銀行業溢利大升2.7倍到380萬元，貢獻唔算話多，但馬交百業興旺，呢期股壇興炒澳門概念，市場睇漏眼，力寶華潤係其一。又力華手頭現金達19億元，每股現金高達0.2元，股東資金則45億元，每股資產值0.49元，現價折讓講緊67%。呢期好多二三線升到飛起，講折讓大兼有咁多現金墊底，唔剩得好多隻，力寶華潤又係其一。
再講，力華持有高達14億元投資證券組合，呢期港股以至外圍股市好靚仔，集團證券投資組合回報，應該好有睇頭。今年頭，恒指高企萬四點之時，力華股價0.193元；家陣港股尚差少少再破萬四點，力華同年頭高位有超過20%距離，抵博。
冠中地產（193）呢期球來球往，集團將喺星期二公布04年業績，若然冇乜大問題，可以扒冷。
冠中今年頭成功收購「世紀21」66%間接權益，開展佢地產代理特許經營業務，照理，食正呢期香港地產牛市熱。數市內涉及地產代理相關股份，得冠中及美聯（1200）可揀，呢期美聯快破97年歷史高位，冠中重喺歷史低位水平載浮載沉，若然業績可以，冠中已經有大落後概念。雖則冠中係神仙股，但資產折讓有達40%，升到上每股資產值3.8仙，潛在升幅72%，唔講得笑。
錢雋