星級名車：自認情緒智商差<br>家強愛Viano大大架唔怕撞

星級名車：自認情緒智商差
家強愛Viano大大架唔怕撞

通常約黃家強做訪問的，大都談音樂，講車實屬少有，可能今次講的品牌是他喜歡的平治則又另當別論。這個已擁有私人Studio的Band友，因為家住新界關係，出入多以車代步，座駕居然變成最長時間的聽歌私竇。至於為何喜歡平治嘛，則和他的情緒智商有莫大關係，對呢部賣七十萬的Viano，鍾愛平治的他當然讚多過彈，重話最啱坐齊一家人呢度去嗰度去。

記者：曾順珍　攝影：陳陶鈞



乘客個個嗌頭暈
家強話自己不愛飛車，因為駕駛技術麻麻，坐過家強車的朋友和家人，落車時都會覺得好辛苦又頭暈暈，尤其是阿媽就成日鬧他轉彎技術差，所以他不開快車，買車都要揀架鋼料堅嘅。
「我認路好差㗎！方向感又唔好，加上我情緒控制差，如果心情唔好，都會開快車，試過深夜時出紅隧口因為跣軚而撞埋牆，車頭摺晒，幸好揸嗰架係Benz，所以無乜事，自此以後，我買車都會揀架鋼料堅嘅車。」

■家強的新碟《畢加索的馬》將於今個月19日推出，現時忙着出席各大小宣傳活動。

啱晒全家坐
試車當日，家強駕駛着平治七人車Viano穿梭北潭涌一帶，速度雖然不快，卻領會到他那無方向感和大腳踩Brake的滋味。家強已擁有平治CLK200，覺得這架Viano在操控上跟其他平治房車沒有兩樣，只是車身長，有點像揸貨Van。
「架車嘅『內臟』跟其他Benz車差唔多，一樣有多功能軚環和其他操控掣，只係畀大油時引擎較嘈，但行車幾暢順又穩陣。另外，車廂咁大最啱一家大細坐，如果揸佢出外拍戲，因為車廂有摺合式小枱，所以有空時還可以匿喺裏面寫吓嘢或同人傾偈。呢架車唔可以講得係豪華，但就好實際，以六十八萬多買一架平治嚟講，都算係咁上下囉。」

座位可拆可摺

■中排座位可以向前向後擺放，只是先要把座椅整張抽起，再插回平台上便可。

■個別座位可以整張拆走，把中排座位和摺枱向後放，便跟後排形成小型會議室。

■後排座位又闊又大，點瞓都好舒服。

■最後排座位可以摺起，擴大尾廂空間。

■不想要摺枱，可以把它收藏在兩張椅之間。

開篷減壓力
身為音樂人，聽歌是一個吸收過程，而在車內聽歌，幾乎成為他最重要吸收外來事物的空間。以為他會把車內的音響改頭換面，怎知他說因為架CLK買了幾個月，還在保養期間，所以他並不打算自己改裝，免得失去原廠保養。
「我鍾意Benz係因為佢性能好又耐用，我𠵱家呢架重係開篷車，只要一開篷，所有壓力都會即刻無晒。除咗Benz，我都鍾意新款MINI和smart，細細架好啱我，個樣又靚。我買車最緊要樣靚，馬力唔需要好大，但起碼喺爬頭時可以一踩油就去；Jeep就一定唔得，因為我覺得會好容易翻車。」

■有時揸車都會給家強創作靈感，那首《青馬大橋》便是從駕駛中得到靈感。

平實配套

■除車頭天窗外，後座亦設有兩個電動天窗連遮光簾。

■後座車頂置有冷氣調校和出風位。



四方盒外形

■左右車門用上方便的趟門，令出入更容易。

■襯有桃木飾板的中控台，有齊恒溫冷氣和音響系統。

■車尾門側設有升降地台按鈕，方便擺放或提取物件。



BenzViano3.2
引擎：3199ccV6SOHC
馬力：218ps/5600rpm
扭力：31.1kgm/4500rpm
傳動：5前速半自動波
懸掛：（前）麥花臣支柱（後）扭力連桿
制動：（前）透氣碟（後）碟式
輪胎：225/60R16ContinentalVancoContact
尺碼：4993×1906×1875mm
軸距：3200mm
車重：2140kg
0-100公里：11.0秒
極速：184km/h
車輛提供：金濤汽車（29222933）

■車身長度足有4993mm，坐滿七個人仍感寬敞。

■驟眼看去，Viano的車頭設計有點兒像AClass。

■車尾四四方方，配有一排煞車燈，異常耀眼。