今個月最令人引頸以待嘅，唔使講當然係《蜘蛛俠2》啦！論經典，第一集嘅綠魔，同今次第二集嘅八爪博士，都係蜘蛛俠最難纏嘅致命宿敵，打鬥場面之燦爛、音效之震撼力，筆者剛睇完試片即寫此稿，毛管都重有豎起嘅感覺；不過論到第二集更優勝之處，係人物感情位明顯豐富咗，再加呢位超級大英雄生活瑣事上的種種難處，感覺呢集來得更有血有肉。
記者：朱崇德
所謂買碟睇價錢，今次《蜘蛛俠2》使用了DVD雙碟裝設計，約價$139-$165，都幾海鮮吓。不過據知嚟緊韓版3區會有行dts靚聲嘅SUPERBIT版推出，加上網上又流傳05年中又會加推《Spiderman2.5》加長版，正所謂珠玉在前，叫人睇到心都亂！
故事背景發生在第一集的2年後，彼得基本已全職投入蜘蛛俠「工作」，不過由於工作無定時兼經常突發性加班，令到呢位超級英雄嘅真實人生，變得一塌糊塗，不論在親情、愛情、友情、事業及學業各方面，都面臨着全盤嘅失敗，可能心理影響生理嘅關係，連帶令佢嘅蜘蛛能力，變得時得時唔得！正值彼得萌退意「唔撈」之際，佢遇上了一生中至強嘅宿敵─八爪博士，正所謂「能力愈大、就麻煩愈大」，一生至愛的兩個女人─梅嬸及瑪莉珍，都完全命懸在這魔爪之下，幸好彼得最後再次重拾自信，決戰八爪博士。
炸機一流
論劇情，今集相對地實在好多；唔係一味靠打！多咗好多細緻的情味描畫！當中彼得同梅嬸嘅幾度交手令人最難忘，$20生日禮物、彼得真情告白，都係非常到嘅位，夠真摰感動！同類片好少做得到呢點。此外，笑位亦是大量加入的新嘗試，當中最鬼馬係「𨋢內二人談」，談甚麼？蜘蛛俠自己彈番自己套蜘蛛衫，而且好明顯係玩「內心戲」，而且非常切「身」到「肉」！武打場面明顯較上集少咗，不過就重質不重量！最好睇是在架空火車上一戰！有空間同速度感之餘，亦善用了兩位怪人打鬥嘅特性，絕對是精心鋪排之作，而且聲效又唔錯，炸機絕對一流！
