上星期二本欄講《唔識黎智英》，本以為係趣事一宗，誰知《蘋果日報》讀者多籮籮，影響所及，立即收到電話，其一來自發行大哥萬事德，佢話可以寫包單，沙田商務印書館與大眾書局之內，絕對有黎智英嘅作品出售，沙田陳太嘅親戚搵唔到，可能係有誤會之故。萬事德收線冇幾耐，一位商務印書館高層來電：「喂，左生，你喺《蘋果》話沙田商務冇黎智英本書賣，與事實不符，我哋已經仄清楚，係有嘅！黎智英嘅《事實與偏見》係佢嘅書之中，比較賣得嗰一本。至於嗰位年輕售貨員，唔知係邊位呢？」
嘩，記得都唔敢講，今時今日，千祈咪制。其實該文主旨係慨嘆年輕人唔留意身邊事物，做嗰行就要熟悉嗰行，連所謂productknowledge都唔掂，點可以升級呢？香港學生要多啲通識教育至得，通識乃專業之基礎，既冇通識，又唔專業，點樣可以做好份工呀？記得幾年前到紐約，往一間Barnes&Noble分店一行，因為店太大，唔想嘥時間，就問櫃台服務員：「MichaelPorter嘅書有冇？」服務員即刻話：「第一層轉右商業與經濟書架。」然後佢按電腦，又可以立即講出目前書店有邊幾年Porter嘅書，問左丁山啱唔啱心水？呢類服務真係冇得彈，商務印書館已經做得幾好㗎嘞，希望能夠培訓前線員工，在電腦系統上可以追到B&N嘅水平。
講到時下年輕人，原來其中好多對傳統四字詞語不甚了了。某日與幾個年輕朋友談話，講到老董政績，乏善足陳。四位大學生話唔知「乏善足陳」點解。一位中學生（已畢業）話識，點解會識呢？佢話：「讀中學好似未見過，但最近學睇《蘋果》馬經，『乏善足陳』呢四個字成日都見到，譬如話『老馬安圖，最近戰績乏善足陳。』睇得多咪識囉！」