「旋轉270度」係一個舞台劇嘅戲名，一個香港話劇團嘅劇目，張達明編劇，導演。名字上睇唔出乜嘢意義，只係指示咗一個動作，呢個動作可以係水平角度向左向右又或者係垂直角度打個側手翻咁上下，通過訓練係應該有機會做到。但係套戲講乜呢？一般人可能以為要去香港文化中心睇班冇一個你講得出佢個名嘅演員喺你面前好誇張咁喊晒做嘅戲。事實完全唔係咁，「旋轉270度」係一個好有內容嘅戲，演員出色，導演用心，如果要討論可能要寫多幾篇專欄。不過最少我知道咗原來BB仔出世前係要旋轉270度去到一個合適嘅姿勢迎接人生。
最近上一個編劇課程，有同學問一個有關改戲名嘅問題，佢話我啲戲名同內容唔貼題，我一啲都唔嬲，我知佢唔明啫。首先我覺得改戲名第一件事最緊要係「型」，其實有時真係可以同部戲無關，大家都唔會諗住睇部戲個戲名都直接指出部戲嘅內容，如果係，咁「龍爭虎鬥」就應該係一部關於大自然嘅戲。「小白龍」係講一種已經絕種嘅生物。「愛與誠」應該改做「係泰國兩兄弟唔鍾意對方」。「無間道」一定要叫做「兩個卧底，一個係警察，一個係黑社會。」
有質素嘅戲名應該係「型」得嚟又同戲內嘅主題配合，有時係暗示，有時係意會。不過莊文強有個講法幾特別，佢話戲名唔重要，最重要係海報上嘅字款，你諗吓如果「精裝追女仔」嘅卡通光管字換咗做「柔道龍虎榜」嗰啲強而有力嘅毛筆字就係人都唔知部戲想講乜啦，好似有啲道理。