美國加息，本港減息，港股嘅反應厲害，恒指一彈就係159點，當然，美股掂檔對港股有帶動作用，而美股上升，則主要因為油價下跌。隔晚美國CRB（商品指數）成份商品中，跌得最勁嘅係發熱油、原油、天然氣，跌幅由2.8%至5.8%。
中信C輪：大升市中，恒指成份股中，有4隻冇升跌，有3隻下跌。中信泰富（267）原地踏步，企響21元。大市輪流發展，中信先一排升得急啲，𠵱家唞唞，唞完之後，有機會再上過。
中信C輪4483可以細細注諗吓，明年10月到期，輪價23.7仙，溢價10.7%，槓桿率8.9倍（有效4.7倍），引伸波幅34.6%。中信始終係移動得比較慢嘅股票，揸4483，當然唔適宜期望會有大爆炸力。
電盈C輪：電盈（008）好似中信咁，唔肯郁，收4.90元，下周一除5.5仙息。落後個市，遲早有機會跑番快啲，一如旗下嘅盈大地產（432），唔聲唔聲，喺過去5日已彈升27%。
吼位買電盈C輪，9814最啱落手短炒，明年1月到期，輪價18.3仙，溢價5.5%，槓桿率26.8倍（有效11.8倍），引伸波幅28.6%。唔嫌交投少啲，揀4664，明年6月到期，輪價49.5仙，溢價9.7%，槓桿率9.9倍。
裕元C輪：裕元（551）收20.05元，跌40仙。美股好，代表美國經濟亦係睇好，裕元係出口股，理應得益。裕元C輪，成個市場得隻2110，明年1月到期，輪價20.3仙，溢價3.9%，槓桿率9.9倍（有效6.7倍），引伸波幅35.8%，冇成交，玩唔過。
章盛