英國球星碧咸（DavidBeckham）自從效力皇家馬德里後，佢哋一家四口都少咗時間喺埋一齊享受天倫之樂，好似最近大仔布魯克林（Brooklyn）就喺西班牙返學，而兩歲嘅細仔羅密歐（Romeo）就同媽咪Victoria喺倫敦shopping。
老竇碧咸雖然早排捲入幾單桃色緋聞入面，但佢近來成日抱仔出街，盡顯一派慈父風範，估唔到真係可以幫佢洗底，佢喺世界各地好多小朋友心目中，唔只係一位好偉大嘅足球員，而且重係個好爸爸，有見及此，聯合國最近委任碧咸做聯合國大使，佢將會肩負重任去幫助世界各地嘅兒童，而首項工作就係去幫助非洲小朋友。
而最近碧咸嫂Victoria俾英國嘅狗仔隊偷拍到佢帶住兩歲大嘅細仔羅密歐喺倫敦shopping，留咗一把金色長髮嘅羅密歐愈嚟愈精靈可愛，佢坐喺私家車入面嗰陣表現得非常活潑，當有狗仔隊隔住車窗影佢嗰陣，佢重好開心咁對住鏡頭微笑，又伸隻手仔出嚟手指指，非常趣致。當Victoria帶佢落車去shopping時，羅密歐亦好聽話咁拖住媽咪行街，完全冇扭計。