醫生J係單身貴族，多年來在公立醫院工作，有醫管局呢棵大樹遮蔭，雖然搵銀冇佢啲私人執業嘅同學咁多，但勝在薪高糧準，唔使擔心生意，亦唔使過份拼搏去搶錢（例如佢一位兒科醫生同學，農曆年初三已經開工，整日生意滔滔），可以享受私人時間。
有餘閒，做乜好？呢日與醫生J閒談，發覺佢對投資產品非常熟悉，連滙豐銀行的甚麼結構性外滙存款都講到頭頭是道，至於股票嘅澳門概念、地產周期等等，都異常熟悉。於是問佢：「乜你咁鬼專家款㗎，平時唔使醫病咩？」醫生J大笑：「我唔出去掛牌搵真銀，都要諗辦法增加收入嘅啫，我睇財經版，聽財經台，銀行為我呢類Premier客戶（存款一百萬元以上）辦投資講座，我一定去，呢幾年來我嘅投資都跑贏大市㗎！」
講講吓，原來醫生J好鍾意聽胡孟青，佢話胡小姐講股，勝在夠膽，說話撇脫，唔會講咗等於冇講。不過醫生J話胡孟青就快唔撈，以後聽唔到佢主持嘅節目咯。醫生J消息靈通過左丁山，知道胡小姐會轉工，新僱主唔准佢兼職上電台電視講股仔喎。
由澳門概念股講到澳門經濟，醫生J話：「投資移民（一百萬港紙就得）做澳門居民，有着數㗎，除咗買樓等升值之外，澳門政府𠵱家好多錢，澳門公立醫院買西藥多數買正嘢、新藥。香港窮到死，公立醫院內舊藥充斥，有啲已經在外國被市場淘汰咗嘅藥，我哋照用，所以你哋想有好藥，唔該你去睇私家醫生。近來又出新招數慳錢，就係一粒大藥分幾次食︱︱譬如我寫畀病人食藥，每次一粒八十克；醫院為咗節省庫存成本，買入一粒三百克嘅藥丸，叫病人分開食！」唔聽醫生J講古，都唔知醫管局識得咁慳家，難為了何兆煒呢位家嫂。