美國加息，香港就因為熱錢流入而唔加息重要減息，港股重邊有唔升嘅理由呢？滙控（005）及地產股齊齊造好，帶動恒指升159點，收報13784，成交達230.54億元。其實資金唔單止流入香港，亦流入整個亞太區，港元相對貶值，基本上對本港經濟有利。
張如深旗下隻邁特科技（1031）早前已發出2000萬元可換股票據，前日又配股集資近1億元，噚日復牌通告重講明話要增加法定股本進行新一輪抽水活動，但通告就無講明因咩事抽水。傳統智慧話畀阿虎知，遇到上市公司出現呢種情況就應該即沽走人，因為呢類股份隨時會被大手質低的。
不過邁特噚日不但未見沽售壓力，反而一度大升75%至0.18元，收報0.151元，升46.6%，成交達1.732億元。黑客聽聞話公司大舉集資又係為咗想進軍澳門，想借此勁炒一番。
大華國際（600）股東會後表示有意進軍澳門酒店業後，股價又即時炒高58%至0.35元，收報0.26元，升17%，成交達2338萬元。澳門實德（487）復牌股價仍然好得，全日升8.45%至1.54元。種種迹象都顯示，濠江概念仍有捧場客，仍可作為炒作藉口。噚日勁升43.43%嘅奧瑪仕（959）據聞又係炒濠江概念。
其實濠江概念炒得咁熱烈，無理由澳門商人柯為湘旗下嘅九龍建業（034）同保利達（208）竟坐冷板凳。
中國10月通脹放緩至4.3%，顯示宏調見成效，噚日國企股曾見蠢蠢欲動，但據聞有芬佬減持，限制國企指數升幅，全日只升0.77%至4831。
阿虎