早排張衞健同謝霆鋒拍劇集《小魚兒與花無缺》嗰陣涉嫌打傷內地演員王伯昭，之後佢兩個去醫院探王伯昭兼向佢道歉，但王伯昭條氣重未順番，唔單止決定告張衞健同謝霆鋒，𠵱家重告埋內地嘅公安局，點都唔肯罷休。
王伯昭認為張衞健同謝霆鋒係假戲真打，故意打佢，件事初時交咗畀公安局懷柔分局轄下嘅楊宋派出所調查，楊宋派出所認為張、謝兩人冇故意傷害佢，只係拍攝過程中有行為上嘅過失，認定兩人「沒有違法事實」，十月十八號作出決定唔受理件事。王伯昭唔服派出所嘅決定，於是向巿公安局懷柔分局提出行政複議，但懷柔分局認為張、謝打佢係屬於「劇情需要」，同樣冇故意傷害王伯昭，所以維持楊宋派出所做嘅決定。
王伯昭認為派出所冇去現場調查清楚，係違反咗法定嘅程序，所以佢決定連巿公安局懷柔分局都告埋，懷柔法院已經正式受理咗王伯昭嘅事件，件事再搞落去，真係唔知幾時先搞得完。
台灣名模林志玲前日做金飾代言人，噚日又宣傳DVD機，兩日搵咗接近二百萬港紙，呢半年內佢做咗十一項產品嘅代言人，真係發過豬頭，林志玲重啱啱應承咗做今屆金馬獎嘅主持，又話自己已經預咗會俾人批評，但佢到𠵱家為止都重未睇過任何一套入圍嘅電影，嚟緊佢會喺屋企狂睇戲做功課。
劉浩龍噚日接受商台訪問，最近佢去驗身，報告顯示佢都好健康，只係血糖過低，劉浩龍話：「因為自己一食嘢，個身形就會好易膨脹，所以近幾年都冇好好咁食過飽飯。」其實好似劉浩龍咁嘅身形，馮仁昭都覺得算適中啦，只要佢蒲少啲，人都自然健康啲。
奧斯卡得獎導演米高摩亞（MichaelMoore），自從美國總統布殊獲選連任就好唔高興，所以佢最近決定籌拍《華氏911》續集，再揭布殊嘅瘡疤。米高話：「喺剛剛結束嘅美國總統大選中，有百分之五十一嘅選民，都唔係好了解布殊政府嘅政策，布殊嘅選舉團並冇講畀人聽真相，所以教育同啟發公眾讓人了解實情嘅任務，就落喺我哋身上。」
at17前日喺新城接受訪問，佢地最近好努力咁練跑步，原來佢哋參加咗由Nike舉辦嘅十公里長跑，喺今個月二十一號就會出賽，早排啲藝人走去參加跑樓梯，結果唔係抽筋就跑到嘔，問到佢哋驚唔驚好似人地咁，at17話：「其實佢哋咁樣好危險，所以我哋成個月前已經開始練。」
