打WarGame單玩兩隊互殲對戰駁火無新意，想與高手過兩招，12月初就有一估計超過300人參加的大型比賽等着你。有別過往模式，比賽場地鐵定在逾10萬呎室內新場進行，新場更是《新警察故事》其中一個主要取景點，參賽者需接受連串仿軍事行動設計的任務，考實力考頭腦，好彩贏個冠軍，有排威呀！
記者：尹珊珊
攝影：楊錦文（部份相片由錦田野戰訓練營提供）
模特兒：Crystal（StarAsia）
打WarGame不一定要到荒山野嶺，只要面積夠大，移師室內開戰同樣有真實戰爭效果，是次WarGame比賽選址的屯門億寶片場面積達10萬平方呎，前身為小欖海水化淡廠，數月前被一野戰訓練營租用作WarGame場，搞手Jim說：「室內開戰唔使擔心天氣問題，打風落雨都唔使改期咁掃興。」參觀底層主場景，熟口熟面，原來《全職殺手》、《暗戰2》、《千機變》及成龍哥哥的《新警察故事》也曾在此取景，比賽當日還會擺放貨櫃、舊車等道具加強真實感；上二三樓轉一圈，走廊兩旁盡是空置房間：「空房適合分組玩Mission（任務模式），唔使點布置已經好逼真，可因應廚房、實驗室等唔同場景設計出唔同主題任務，玩起嚟更投入。」
打WarGame至怕參加者「唔認死」，自2000年一場WarGame由室外打到上差館後，本地鮮有大型比賽舉行。前車可鑑，Jim和拍檔Billy安排措施以防參賽者「賴貓」唔認數：「除總裁判外，每場比賽最少有五位監察員，比賽期間若擊中監察員、粗言穢語、武力解決，小則扣分，大則取消參賽資格，總之一切以公平為重。」
比賽當日以玩任務模式為主，Billy解釋：「Mission即指定時間內完成一項任務，講技術勁食腦，例如會模擬一宗軍事行動，參賽者要殲滅敵人兼喺有限線索下搵番個卧底，比起傳統兩隊對戰互殲玩法更刺激。」講多無謂，即場示範最實際，Billy與Jim當隊長，帶2名女將Barbra與Joey落場，美少女Crystal斯斯文文，揸槍駁火無佢份，商議過後被委以重任──做人質！大反派則由「翻版吳浩康」Nick與間條衫哥哥擔任。
人齊，開波！由主場景一路向上掃，來到三樓，空房多，隨時有埋伏，見無料到，折返二樓，逐間房搜，突然背後傳來「啪！」一聲，間條衫哥哥率先發難伏擊，幸好Jim即時閃避「唔使死」。其後兩男行頭，兩女掩護，終在一廢置房間找到人質所在，雙方一輪駁火，Nick與間條衫哥哥終告不敵，慘死亂槍下。
比賽玩足2日，所有隊伍都要留宿場內StandBy，一接獲任務就要即時出動，少啲精力都頂唔順，好彩大會識做，見賽車比賽有賽車女郎，就照辦煮碗找來一班WarGameGirl落場打氣。器材方面，WarGame迷多用慣私家槍械，故每隊人馬要自備軍服、安全設備、私伙電動槍械，萬事俱備，12月大賽會場見喇！
主辦單位：錦田野戰訓練營
比賽日期：12月4至5日
比賽地點：屯門小欖青發街59區億寶片場（樂安排小欖跳蚤市場側）
比賽內容：分初賽、複賽、決賽及總決賽4個階段，包括互殲和任務模式2種。
參賽資格：每隊參賽人數必須為15人，包括隊長1名，另可帶最多5名後備隊員；每位隊員年齡必須為16歲或以上。
總隊數：32隊
收費：每隊$4,000（包來回旺角交通、場租、午餐到會及獎品）
截止報名日期：12月1日
報名及查詢：陳生98442388或尹生98091972
雖然只係做人質，但子彈喺身邊飛來飛去，佢哋個樣又咁認真，已經覺得好鬼刺激，重好驚會唔小心中流彈㖭！
