當一個人孤身置於敵方戰火之中，冇糧餉補給，即使係大蛇都要生食充飢。KONAMI嘅重頭大作《MGS3》，就可讓各位體驗呢種生活，其逼真程度更非一般戰爭遊戲可比，鬥力之餘更講求鬥智。香港KONAMI啱啱返咗隻試玩版，除可試到各種新系統外，最正係齊晒武器裝備，學Rambo咁衝鋒陷陣！
記者：許福合
遊戲類型：動作＋解謎
對應機種：PS2
遊玩人數：1人
推出日期：12月16日
開發商：KONAMI
(c)KonamiComputerEntertainmentJapan
闊別多年，《MGS3》可算係各方機迷期待之作，事關係銷量達1,450萬套嘅《MGS》系列最新作品，製作方面更非常認真，由日本知名遊戲製作人小島秀夫製作外，即使動畫亦一啲都唔馬虎，由曾參與《第五元素》嘅KyleCooper製作，音樂方面則由《史力加》嘅幕後班底負責，可謂媲美荷李活電影嘅班底。大家打機之餘，CG片段都唔可以錯過，要慢慢欣賞。
由前幾集嘅現代，轉移至60年代嘅冷戰時期，場景也從前作以建築物與軍事基地等人工建築物為主嘅環境，轉移到危險叢林，並加入野外求生要素。不過最奇就係時間返到幾十年前，不過遊戲中武器似乎太超現代，試玩版中已可開啟大部份武器同裝備，有齊散彈槍、AK47等重型武器，同時亦配有手榴彈、煙霧彈一類威力強大武器，另外最好用嘅紅外線探測器、移動感應器亦都有，即使玩家藏起來之後，亦可以知道附近環境有冇敵人，非常好用。另外更有狙擊槍作遠距離攻擊，瞄準頭部一槍致命，唔怕驚動敵人，可慢慢「清場」。
玩《MGS3》，至關鍵在於一個「藏」字；一般掩護，可找樹影、爬樹、或長草，新引入嘅「迷彩偽裝系統」，帶來更多變化與達成更隱蔽效果，進入設定畫面可換迷彩服同化妝，不過要留意，唔同環境要換番合適嘅迷彩服，去到空曠地方、吊橋、沼澤等，迷彩服效果會消失，最好檢查清楚先起行，並以最快速度穿過，免得成為箭靶。為求真實性，玩家嘅一舉一動都會有互動影響，亦要留意自己生理狀態，肚餓要搵嘢食，受傷就要休息。遊戲開始時敵人還未出現，最好先收集多啲食物，如蘑菇、鱷魚、甚至蜜蜂巢等。不過要留意，每個食物都會有個保存期，過期會腐爛，而且會有數量限制，所以收集唔同種類食物就較為實際。
