【本報訊】津貼小學議會昨日舉行周年大會，邀得財政司司長唐英年及教育統籌局常任秘書長羅范椒芬出席，結果演變為二人的「訴苦會」，「鬥數」工作辛酸，唐「暗串」教統局局長李國章與羅太經常「打龍通」爭資源，羅太反擊指自己「隔咗個局長」，工作難做。
「局長同秘書長嘅關係相當複雜，如果局長唔力爭資源，實俾秘書長鬧，但有時兩個人又會打龍通㗎喎，唔係淨係爭資源咁簡單。」任主講嘉賓的唐英年昨直言自己工作「唔易做」，「錢永遠都唔夠用」。
出席同一場合的教統局常任秘書長羅范椒芬其後笑言，自己的工作更不易為，「因為之間重隔咗個局長，（唐）又話我會鬧佢，好似我忽然之間惡咗好多咁，你哋都知我唔係咁！」引起哄堂大笑。
對於有校長指諒解羅太「巧婦難為無米炊」，唐即不忿說，「點解你哋唔同情我呢？唔好以為我啲錢係天跌落嚟㗎喎，我啲錢都係好辛苦搵。」然後繼續「呻」辛苦，指日前開展來年財政預算諮詢工作，民建聯及自由黨兩大黨均不支持開源建議，「連呢兩個所謂『友黨』都唔支持所有開源措施，第日見啲所謂反對黨咪重難。」
不諳教育政策的唐，在答問環節三度邀請羅太增援。有校長直言不滿專科專教增聘教師的政策只有三年期限，擔心難以聘請優質教師，以及浪費培訓資源。羅太則表示要顧全大局，暫時無辦法解決人手問題，「希望醉心於教育嘅人士唔會因為聘用證係長約或者合約而離開，如果對自己有信心，只係會講『我係合約，你炒我咪係你損失。』」一番言論令全場嘩然。鮮魚行學校校長梁紀昌則建議唐英年在來年的財政預算案中，加入向學校捐款申請免稅的建議，以減輕政府負擔。