范太先夫范尚德辭世，噚日喺香港殯儀館設靈，今早舉殯。范太縱橫政界多年，唔少政經界大人物都有到場表達心意，大孖沙如鄭裕彤、黃志祥，黃昏五點幾已到場鞠躬；一哥李明逵、財爺唐英年同吳光正則前後腳抵達；阿松同馬時亨兩兄弟同時出現；孫明揚夫婦、李國章夫婦、黃容根同譚耀宗亦有前來致祭。而特首、廖暉、朱育誠、岑建勳、馬丁、華叔、李嘉誠、呂志和及葉劉淑儀等數都數唔晒嘅名人，都有送上花牌，范太江湖地位可見一斑。
范太夫婦非常恩愛，范生去世對佢確係好大打擊，不過范太係堅強嘅人，噚日雖然神情哀傷，但冇喺人前流淚，八方希望范太節哀順變。
馬仔去鞠躬前，原來先落觀塘巡視，先後到過順天邨、順利邨、淘大花園，其間路經順天邨廖創興銀行，見到好多阿叔、阿嬸對住部股票機㩒掣，佢又手痕㩒埋一份，小股民見局長出現，以為佢有貼士鬼咁歡喜，馬仔身在其位，當然冇料到啦，不過由小股民熱情反應睇，似乎大家已經唔記得仙股事件一役，唔通馬仔已經成功洗底？
巡區少不免破財，馬仔分別喺順利邨街市買生果同喺淘大花園買咗百幾蚊擺設，乘機收買人心。
傳真︰2623-9278
電郵︰
