美國加息，香港不但唔跟，部份銀行重減息㖭，搞到市場一直用開嘅P（優惠利率），突出現兩個版本，既有五點一二五厘，又有五厘，咁買家承做樓按時，就要打醒精神至得。
專門做樓按轉介生意嘅經絡集團，就做咗個「不一樣Prate」調查，訪問咗一百五十個現正揀選按揭嘅人士，發現五成一認為，出現個兩Prate版本，搞到佢哋覺得好混亂。
另外，由於兩個Prate版本息率相差零點一二五厘，七成一表示，會影響佢哋搵銀行做樓按嘅決定。
經絡集團副行政總裁盧子勇話，公司已經成立咗條熱線，解答市民有關查詢。佢指出，雖然陸續有銀行加入減息行列，但過渡期間置業人士，喺揀選按揭上仍有疑慮，所以中介人角色更形重要。經絡認真識乘機宣傳。
𠵱家除咗中銀香港外，其他銀行嘅樓按息率，已經睇齊係五厘嘞。
聖誕節重有個幾月至到，但係地鐵旗下九龍灣德福商場，已經差唔多完成聖誕新裝修，搶先吸引消費者前往使錢。
聽地鐵講，商場內有一棵逾三十呎嘅聖誕樹，今年不惜工本，用咗三萬呎「發光二極體」（LED）嚟做裝飾。光亮度比一般燈飾高，但更柔和，價錢就貴五倍。下個禮拜就會全部完工，有得睇嘞。
樓花單位唔少一年轉手幾趟，原來二手樓都有，而且重係高齡舊樓㖭。
美聯物業區域經理蔡俊雄話，灣仔駱克道高華大廈單幢樓，樓齡成四十年，高層C單位，八百五十呎，今年四月以八十萬成交。
九月以一百萬沽出，跟住今個月再以百二萬轉手，八個月累積升值五成，幅度分分鐘勁過豪宅。
唔好睇小呢個盤唔夠一百伙，原來今年已經有十二宗成交。
中原地產與中旅社合辦考察團，一行十多人，今日抵港，先參觀中半山麥當勞道十一號新盤，稍後再前往參觀長實九龍塘畢架山一號。
聽聞，呢批日本人，主要從事建築及設計工作，唔知係咪見到近期本港樓市再度起飛，於是嚟港研究吓。今次考察重由教授帶領，具一定學術性。
講開香港與日本，兩地嘅地理環境好唔同，香港無論起寫字樓定係住宅，有條件起摩天大廈；日本則受地震影響，通常都係平房式建築為主。
向來多創意嘅日本人，唔知睇完香港嘅豪宅樓盤，有咩啟發呢？
東涌住咗成十萬人，過多七、八年，就增加到二十萬，但𠵱家居然連醫院都冇間，政府有做緊研究，搵緊適合地點起番間，但最快都要到二○○九年先至有。
不過，有啲東涌居民，對喺佢哋附近起醫院就唔係咁鍾意，借反對東涌大綱圖修訂，提出唔好畀醫院用途出現喺住宅用地裏面，要起就去大蠔或者石門岬喎。
蘭西睇番，發覺距離市中心都好遠。醫院唔係用嚟救命，都要用嚟醫病，咁遠係咪有點那個？
電郵地址：
