正如小初之前所預料，真係愈來愈多人打算趁勢投資澳門，好似噚日搞完單先舊後新配股嘅邁特科技（1031），復牌後勁升46.6％，江湖亦係傳聞佢哋將會進軍濠江。
雖然睇落風險勁高，但經紀陳就話，江湖傳聞邁特今次有大隻佬參與，唔係乾炒牛河咁簡單，稍後重有下文。
邁特前身係錶準時，睇過名就知係賣表，金融風暴之後賣咗殼，響科技股熱潮亦改咗個科技名稱，但結果仍然係無甚作為，繼續為殼1隻，搞咗咁多年，邁特貨源歸邊到不得了，要炒上真係話咁易。
另外，澳門實德（487）終於落實傳聞多時的配股行動，噚日復牌表現都唔差，最高見過1.62元，收1.54元，升咗8.45％。經紀陳話，聽聞今次澳門實德配股，街外人根本分唔到貨，只係個別幾個芬佬要晒，所以股價先至有咁表現。但佢覺得，隻股搞咗咁耐，股又批埋，只要唔跌穿1.28元配股價就已經好有交代，唔好再抱太大憧憬。
慕容小初