吳宇森前晚出席電影交流會，當談到荷李活拍戲的辛酸時，吳宇森不停批評荷李活的拍戲陋習，如開會要爭話事權，而且連尚格雲頓也有剪片權但身為導演的吳宇森卻沒有等等。
吳宇森前晚在西灣河電影資料館，跟影評人出席電影交流會。吳宇森近年轉到荷李活拍戲，原來遇到不少困難，他更公開炮轟荷李活電影人。
吳宇森表示拍攝第一部荷李活電影《終極鏢靶》時，到做電影後期工作才知道自己沒剪片權，吳宇森說：「但係男主角（尚格雲頓）反而有剪片權，佢可以搵剪片去剪片，出嚟嘅效果唔啱我心水。𠵱家荷李活有五個導演有剪片權，而我係其中一個。自從拍完《奪面雙雄》後，我開始有剪片權。」
吳宇森大爆荷李活拍戲要面對很多政治衝突，他說：「我有三分一精力要同人政治鬥爭，三分一精力用嚟拍戲，喺美國拍戲要講好多話，成日要讚演員演技好，𠵱家我決心要拍自己鍾意嘅電影，就算成本低，賺少啲都在所不計，我唔會拍億元製作但劇本唔好嘅戲，我真係好厭倦呢啲主流電影。」
至於吳宇森指的政治衝突，他說：「係人事問題，好惡搞，我同電影公司啲人開會，通常要惡過佢哋，大家要爭話事權，我都差唔多六十歲，唔想咁傷腦筋。」
而成龍昨日在禮賓府獲頒「公益卓越獎」，對於吳宇森炮轟在荷李活拍電影要搞政治，成龍亦認同說：「我知道係有咁嘅事，但就未試過遇呢個問題，因為我同佢角色唔同，佢係導演，要去傾好多嘢，見嘅層面唔同，我係演員，只係負責理接唔接套戲。」
而吳宇森昨日與洪金寶和吳思遠等，在觀塘出席第二屆「電影專業培訓計劃」開學禮。
採訪、攝影：張俊銘、魯萍