一向敢言的黃秋生前晚出席酒會時大肆批評娛樂圈歪風，今次他不但批評別人，亦大數自己不是，他指很多藝人講粗口、吸毒、虛榮、亂搞男女關係和習慣說謊，而他自己則沒學問。
黃秋生、梁詠琪（GiGi）、張達明、林嘉欣和鄧萃雯前晚在灣仔藝術中心，出席「PIP快樂共和」的開幕酒會，該計劃是由詹瑞文為推廣話劇而設。
秋生在會上提到李克勤為了得獎，連錢都不願賺，他完全不明白。黃秋生說：「攞獎都係為搵錢，咁點解為獎，錢都唔搵呢？呢行唔為名就為利，不過點都好，我就覺得最緊要健康，千祈唔好吸毒，啲藝人不嬲都係咁，大家心照啦！」
一向敢言的黃秋生今次不但批評娛樂圈，竟然連自己亦罵起來，他說：「啲藝人冇學問、冇料到，又爛口、未讀過書、吸毒又愛蒲、男女關係又亂搞、鍾意講大話、虛榮、又貪名又貪利，呢啲問題每個藝人分啲啦！記住計埋我喎，我自己就爛口、冇料到、冇學識，緋聞就我話冇都冇人信。」
此外，鄧萃雯前晚不施脂粉現身酒會，問到她面上生瘡，是否因即將來臨的無綫台慶頒獎禮感壓力？她說：「唔係，遊戲嚟啫，你哋唔好咁敏感，生粒瘡就成為話題。」
鄧萃雯續說：「早排俾雜誌摷我屋企啲垃圾，其實之前我都有呢個心理準備，好彩都冇乜嘢，佢哋都係話我去街市買菜，講我啲好生活化嘅事啫！同埋喺垃圾桶發現我有張國畫，佢哋講我呢啲嘢，我睇完報道幾開心。」
