近日全城焦點集中晒喺西九龍文娛藝術區項目，一度被視為會生金蛋嘅香港迪士尼樂園變得靜英英，不過其實香港人依然對佢情有獨鍾嘅。香港迪士尼樂園娛樂事務副總裁蔡樂怡同八方講，早兩星期辦過兩次面試，招聘公園嘅巡遊隊員同埋扮演迪士尼朋友角色，兩日共有成千人嚟參加，當中有老有嫩，好鬼熱鬧。
蔡樂怡話，當日見到好多年輕人，無咩經驗，但睇得到佢哋好有熱誠，雖然未必有好深厚嘅舞蹈或者音樂底子，但就膽粗粗咁走嚟面試。佢話迪士尼唔一定要請啲專業人士，好多管理層都係由低做起，最緊要係請到一班有自信，可以帶畀遊客歡笑嘅表演人員。
蔡樂怡重話，嚟緊重不斷會有面試機會，因為公園一共要請五百人擔任各類嘅表演工作，以及飾演所有迪士尼嘅朋友。八方於是就問，咁香港人有無機會扮演白雪公主、睡公主呢啲角色呀？蔡樂怡只係話無論係公主又好，米奇老鼠或者唐老鴨都好，只要投考嘅人可以成功演繹到有關角色就會予以考慮。
（圖）蔡樂怡大讚香港後生仔女有熱誠，唔知到時會唔會有港產白雪公主同灰姑娘呢？
傳真︰2623-9278
電郵︰