新一屆立法會坐定定之後，以老董為首嘅特區政府包括煲呔同唐唐馬上出動，就各大大小小政策向香港市民同政黨掀起一股「諮詢大競賽」。老董就時間急啲，所以率先搶客，因為佢一月就要發表施政報告，所以大前日見完工聯會，今日見四十五條關注組同民建聯，聽日星期六都馬不停蹄唔休息。老董星期二甩底，約咗湯家驊班大狀食晏，後嚟又話未係時候要押後，睇怕今日唔會再改期啩。
而民建聯就認真搶手，噚日同自由黨先見完唐唐，梗係開天索價。民建聯要求削減一半無鉛汽油稅，將子女免稅額由三皮加到五皮，甚至要唐唐注撥兩億，扶助漁業農業，為求選民一笑，簡直係不擇手段，自由黨繼續爭取放寬七成按揭，同埋爭取將供樓利息扣稅，成為永久性嘅稅務優惠。
不過啲政黨都唔係一刀切反對開源，田少話，如果政府再推邊境建設稅（即係陸路離境稅），阻嚇香港人北上大陸揼骨嫖妓，自由黨一定支持！
傳真︰2623-9278
電郵︰