港股升後調整，恒指收13624，跌47點，期指跌得少，收13596，低水收窄到28點。基本上，大市已全面轉好，現時在高位爭持，無論藍籌同國企，都隱約感覺到有無形之手㩒住，相信係基金同大戶重想收多一浸期指（恒指同國指），如無意外，大市遲點就會出現大升浪，衝破14000，再向高位推進。
前日二三線熱門股回落個勢好急，但噚日又上返晒去。中信21世紀（241）由最低2.45元反彈上2.70元，收2.625元，升5仙，聽講第3波注資好快會落實，短線股價走勢反覆正合低吸，中線則可以止賺位方式持有，目標3.50元至4元。
中國燃氣（384）逆市而升，最高1.20元，收1.18元，升5仙，成交略增至1.34億股。中燃氣的升勢暫時仍受制1.20元阻力，一衝破，初步上升目標指向1.56元。
呢輪外資流入之勢好急，但中資亦不遑多讓，幾間有關係的中資大行同銀行，日日嘅買盤都好活躍，好多隻佢哋主力收集嘅同路股時機一成熟，肯定會星光四射。噚日收到料，話隻中芯國際（981）嘅收集已接近尾聲，要留意在其突破時追進，等有兩至3成利潤就收割。
中資睇中中芯，主要係科技行業已開始上升周期（納指重上2000點），中芯剛宣布今年第3季度業績，盈利3930萬美元，高於對上一季的3420萬美元，亦係連續第4季錄得盈利，比市場預期為佳，而第4季收益亦比原來估計為高。
最重要嘅係，市場憧憬納米晶片技術出現突破，帶動全球晶片需求。中芯目前代工較低端的130納米芯片，但將提升至高端的90納米，並已接德州儀器的定單，明年秋季開始可大量生產。
中芯前景看好，但現時股價（1.71元）同上市價2.69元重有好大段距離。以名氣股而論，中芯表現令人失望，幕後人點諗，睇中資動向，相信遲啲會做番齣好戲。
由今年5月開始，中芯在2元至1.50元間，形成大圓底收集區，家吓股價已重上3條平均線之上，短線一突破1.72元的降軌阻力，而又有大成交支持，則升浪確認，初步目標2元，中線可挑戰上市後高位2.50元。
郭兆誠