噚日城大舉行第十九屆學位頒授典禮，除咗有逾七千五百名應屆畢業生獲頒學位外，同場加映頒授榮譽博士學位，獲頒人士包括Sybase主席程守宗、樹仁學院創辦人兼校長鍾期榮、電視廣播副行政主席梁乃鵬、九龍倉主席吳光正，同埋中國最高人民法院首席大法官蕭揚。
由於學生人數太多，個頒授典禮足足搞咗兩個幾鐘先搞掂，好在都無乜學生瞌眼瞓。爭啲講漏咗，八方喺台下昅到兩位稀客，就係律政司司長梁愛詩，同埋特區終審法院首席法官李國能，八方估計應該係嚟捧蕭揚場。
頒授典禮後，八方走去問主持今次典禮嘅城大校董會主席胡應湘，問佢點睇范太趕走長毛單嘢，佢老哥話支持范太，因為國有國法，家有家規，入得嚟立法會就要遵守議事程序，若果唔遵守，連行政長官董建華都要踢走咁話喎。
傳真︰2623-9278
電郵︰
