下月平安夜是譚耀文的結婚一周年紀念日，雖然阿譚經常要到內地拍劇掘金，不過他的太太為爭取享受二人世界，竟連投資的美容院也退股，專心做跟得夫人。
譚耀文在去年十二月二十四日平安夜與圈外女友Fiona結婚，下月是兩口子結婚一周年紀念，但阿譚經常到內地拍劇，與太太聚少離多，Fiona為爭取與丈夫見面，早前竟連自己有份投資的美容院都退股了。
阿譚日前在灣仔接受訪問時，自言很想當爸爸，他說：「我有啲想㗎，我𠵱家喺生理同心理上都好健康，已經明白到培育、同小朋友交流係乜嘢一回事，不過應該未咁快住。」
阿譚續說：「我太太都冇搞美容院，返內地陪我拍劇囉，係我叫佢唔好做嘢，我成日都唔喺香港，跟我拍戲重好過喺出面做嘢，因為識好多嘢，又見好多人。」
話雖如此，Fiona始終不能每日做跟得夫人，大家見面時間仍不多，阿譚卻說：「點唔見都係兩個月，兩個人好夾都需要有空間，呢樣係相處之道，重要有信心啦，我哋好坦白，諗啲乜都會講，唔會令雙方有乜誤會。」
談到圈中有不少男藝人逢場作戲，或拍戲出現戲假情真，問阿譚是否已給太太派定心丸？他說：「佢知我好奄尖、好挑剔嘅，我解釋過畀佢聽，佢好清楚我嘅工作。我好怕應酬，試過有啲老闆身邊有好多女伴，去食飯、卡拉OK會見面，我覺得周身唔舒服。」
無綫現在播放阿譚有份主演的《爭分奪秒》，但該劇成績平平，未能為阿譚帶來突破，對於多年來在電視與電影之間兜兜轉轉，好際遇多番擦身而過，阿譚笑說：「有啲命運作弄，我冇預到喺電影發展時，就攞咗啲獎項，我喺內地發展拍劇，有啲內地市場，香港又偶有佳作，一路都有觀眾支持，我知足常樂㗎，守住囉。」
採訪：朱倬誼 攝影：仇志德
服裝：FrenchCollection 場地：Gossip51
