教統局喺高中推行通識教育事在必行，官員對異議聲音零敏感，前教育署副署長、聖公會曾肇添中學校長湯啟康早排出席《城市論壇》，唔多畀面公開同教統局唱反調，憂慮家境清貧學生讀通識教育蝕底，因為家境好嘅學生可以買多啲書，甚至請大學教授補習。
湯校長言論聽落幾中肯，但事隔不久就接到教統局常任秘書長羅范椒芬來電，親自解釋局方立場，聽聞談話間重提醒湯校長係每月食長糧嘅退休公務員。范椒咁講有乜意思？據聞湯校長都唔係幾敢隨便推測，但就同身邊好友呻，估唔到退咗休都要同政府企埋同一陣線。
教統局發言人話唔清楚兩人「私人通話」詳情，強調心直口快嘅秘書長樂意聽取不同意見，亦無意向任何人施加壓力。不過教育界議員張文光就唔係咁睇，重話知道唔少教育界人士都有類似遭遇，佢已經轉達畀局長李國章，佢肯約束吓下屬就最好啦，否則學制改革變成假諮詢，對莘莘學子都唔係好事。
傳真︰2623-9278
電郵︰