早前已經發過盈利警告的偉易達（303），噚日終於醜婦見家翁，公布截至今年9月底中期業績，雖然有索償成功的非經常性收益支持，但盈利仍然比去年同期勁跌51％，只賺850萬美元，好彩重有中期股息1美仙派發。
經紀黃話，偉易達自上個月發出盈警以來，股價已由15元樓上跌至家陣的11元水平，所以偉易達業績雖然肉酸，但佢曾經問過個別芬佬，佢哋話股價再勁跌的機會唔大，但短線波動就難以避免。
佢又話偉易達今次業績唔得，原因係管理層估計錯誤，在北美電訊產品生意方面投資大咗，而實際表現未如理想，但估計下半年應該有改善，其實偉易達在電子學習產品收入方面，升幅亦唔細。
一直揸住十多個巴仙偉易達的金手指，由偉易達發出盈警至今，似乎都未有減持過，雖然唔排除係因為入貨成本便宜之故，但亦可能係對偉易達長線有信心。
偉易達股價已經跌咗唔小，現價守得住亦唔出奇。
慕容小初