恐怖主義一代宗師阿拉法終告不治。阿拉法生前算係作惡多端，首創劫機恐怖行動，又策劃巴游一九七二年潛入慕尼黑世運村，殘殺以色列運動員。後來，阿拉法雖然自稱放棄恐怖路線，但佢本人早已搵長上岸，對於佢啲藍燈籠徒孫輩如真主黨、拉登等恐怖罪犯，阿拉法一直都有氣冇力咁作狀「譴責」，但其實，呢個鬍鬚鬼先至係第一代罪魁禍首！
獨裁政權瓣瓣都熟口熟面。阿拉法雖死，不過佢老婆蘇哈，有「巴勒斯坦江青」之稱，不但壟斷阿某家產，重以偉大導師未亡人身份，發動一干皇親國戚，圍攻巴勒斯坦總理嘅政府，日日大吵大鬧，雞犬不寧，睇吓幾時有「阿拉伯華國鋒」出現，配合扎卡維、拉登等武裝勢力，逮捕蘇哈四人幫嘞。
閒話表過，講番立法會呢個特區小朝廷。泛民主派動議，由特區政府出面安排，中央人民政府與全體六十名議員會面，聽取立法會就○七○八普選意見，姿態低到無可再低，由特區政府出面，亦已照顧到呢個政府嘅自卑心理，但立法會內太監奴婢勢力大聯盟，予以否決！
自由黨周梁淑怡，以一副蘇哈型嘅口脗，大罵泛民主派，話若然任由全體上北京，㩒唔住佢哋把口，見到啲中央官員，俾佢哋講咗啲唔啱聽嘅說話點算？佢話立法會要先尋求「共識」！
周梁蘇哈直頭係九唔搭八！若然立法會有「共識」，咁又使乜提出意見？千人一口，萬口一詞，立法會又使乜六十人咁多？由周梁蘇哈一人「代表」晒所有嘅「共識」，亦即「除非中央主人點頭，否則特區永遠冇普選」，一張機票上京，咪慳水慳力？
就算係殖民地時代，民主黨立法局議員去英倫見首相、外相，例如傾國籍法問題，都隨時有火爆場面！至於外相賀維訪港，當年李永達直闖會場，拉起橫額，大罵賀維BullShit，都重民主過今日，想將香港變為中國殖民地？一向馴服嘅周梁，自認為可以搶韁居功，但今時今日嘅香港，經已唔係一九八四年！
梗係有唔同意見，先至要提出商討。當年尼克遜訪問中國，唔通要向中方首先保證對共產主義全球實現有「共識」，先至可以起行？梗係廢話！
（圖）周梁怕㩒唔住民主派把口，係咪過慮呢？
傳真︰2623-9278
電郵︰