今年歇冬期球員肯定唔使愁冇波踢，皆因一項「罰球專家」比賽將會十二月喺西班牙馬拉加展開，碧咸、卡路士等當然有份。
今次比賽將會邀請三十名世界各地「罰球專家」，同埋六名世界頂級門將好似簡尼、卡斯拿斯等參賽，分開兩日進行鬥射罰球，其中碧咸、卡路士、施丹同朗拿甸奴列為種籽，喺第二日同其他透過初賽晉級球員較量。
據參賽名單，華朗、尼維特同波勒都有份，而且重有一批亞洲球員，好似中田英壽、宋宗國，中國就由效力上海國際嘅申思做代表。我求大俠平時睇球星比賽時自由球入波就見得多，今次雲集咁多球星鬥射罰球，的確噱頭十足；如果有公仔箱買到呢次比賽播映權，我求大俠同香港球迷真係大飽眼福。
中港之戰下周三舉行，據報呢場世盃外圍賽門票銷售理想，只剩兩種門票出售，亦有黃牛黨開始炒賣；預計連贊助，國足會有三百萬進帳。國際足協決定額外派特別監察員到廣州監場，球證亦定咗清一色由南韓球證負責。不過，如果真係打唔入八強賽，賺三百萬都補唔番！
被傳會喺停賽期滿後加盟祖雲達斯嘅羅馬尼亞前鋒梅度，話自己喺十八歲嗰陣，喺個女仔身上惹到一種叫梅毒嘅性病，雖則已醫好，但就搞到佢啲血有問題，令佢對禁藥呈陽性反應。收費台之前有個講波佬，成日將梅度讀成「梅毒」，我求大俠以為佢係失言，𠵱家終於明點解。
經過周二、三嘅八場比賽之後，今屆德國盃八強已告誕生，其中拜仁慕尼黑最威，共有兩支球隊入咗今屆德國盃八強，一支係甲組隊，另一支就係南部丙組隊（即係業餘隊）；其餘六隊清一色係甲組隊。話時話，如果拜仁兩兄弟抽埋同一條線，唔知細佬會唔會讓路畀大佬呢？
前NBA籃板王洛文最近簽咗ABA聯賽嘅OrangeCountyCrush，咁啱早前過咗美國磨練嘅「台灣飛人」陳順安，又喺呢隊打波。據聞正在養傷嘅馬龍最近亦都嚟過練波，想正式復出前喺ABA打幾場當熱身，如果真嘅話，「壞孩子」同「郵差」加「台灣飛人」夠晒噱頭！