美國加息，香港大部份銀行都唔加，而滙豐、恒生（011）同渣打（2888）重不加反減，將優惠利率降至5厘，真係令供樓業主喜出望外，但依靠收息過活的老人家就喊得一句句咯。
講到尾都係因為流入本港的熱錢太多，銀行體系結餘有成141億元，滙豐柯Sir話要降至3億元才有加息壓力。
股神代表拜訪國壽（2628）惹起唔少聯想，雖然國壽已表明冇傾過入股事宜，但股價仍升2.68%至5.75元，成交高達12.7億元。
國壽股份已上市，可公開買賣，若股神要掃貨，照計毋須國壽批准，股神以往在市場掃過中石油（857），現在一樣可以掃國壽，問題在於股神的心意。以國壽H股現時市值427.9億元計，若股神要掃入10%，便至少要42.79億元（未計股價上升因素）。
中煤（003）噚日大跌3%至15.90元。中煤股價唔平，最近主要靠回購支持股價，但公司近期回購價最高都只係14.80元，現價似乎炒過龍。
思捷（330）主席配股，股份復牌跌逾5%，收報42.50元，據聞今次配售以下限41.20元定價，認購反應亦唔多理想，主要是因為芬佬嫌貴。市場更傳出主席可能會全身而退，日後會悉數沽售思捷都唔定。過往思捷每次批股，股價都持續上升，但今次情況可能有變。
阿虎