曾主演《開朗少女》、《紅豆女之戀》嘅韓國人氣女星張娜拉早前應邀為一本中國推出嘅韓國愛情小說《愛的語法》擔任代言人，前日佢就為呢本小說飛到北京，重喺王府井書店出席新書簽名會，但由於參加嘅記者同fans太多，搞到場面混亂，結果新書簽名會只舉行咗十分鐘就被迫腰斬。
前日中午，張娜拉同作家羅相萬齊齊飛到北京，出席小說《愛的語法》嘅新書簽名會。喺活動開始之前，本來大部份fans同在場記者都好冷靜咁坐定定，點知張娜拉一出現，情況就開始失控，成班記者湧到台前，圍實張娜拉影相，後面嘅fans就因為睇唔到張娜拉而向前推撞，結果造成大混亂。
雖然主辦單位曾經向記者要求先舉行簽名會，然後再做訪問，點知佢哋當係耳邊風，重同工作人員發生口角。最後，張娜拉只係喺簽名會逗留咗十分鐘，就由工作人員帶走，簽名會就咁玩完。
據知小說作者羅相萬係張娜拉喺韓國中央大學表演系嘅老師，為咗回報恩師，張娜拉今次為小說做代言人而冇收任何酬勞。事後羅相萬都話，估唔到張娜拉喺中國嘅人氣原來係咁厲害嘅。