近排樓市靜咗啲，為重燃買賣情緒，代理都要搞吓噱頭，好似沙田第一城剛有一宗成交，炒家揸咗四十五日沽出單位，執到十五萬，升值一成半，唔算太特別，但代理用另一個方式嚟演繹，情況就唔同晒，賺幅即刻升至五成，係咪好吸引呢。
單位係四十一座中層D，四百一十呎，九月底以一百萬成交，畀咗三成首期即係三十萬，代理就淨係用首期嘅金額計，變成有五成回報；不過，買賣所涉及嘅一切費用，就冇扣除，代理咁做成功搶到市場注意力，目的已達。蘭西就覺得此舉十分取巧，甚至可以講係出術㖭。
𠵱家市場數據真係花多眼亂，一單成交有唔同演繹，問題係你點睇。而賣方最主要想知道，係賺到幾多錢，係咪覺得夠。不過，蘭西喺度勸吓啲想炒樓嘅人士，一切要小心啲，睇真啲。
美聯物業指出，十月共有二百二十三宗逾千萬元二手住宅登記，比九月急升近七成六，同今年四月高位僅差四宗，可見市況幾咁熱烈。
港島區係最多嘅地區，共百六宗，註冊量最多嘅五個屋苑，薄扶林貝沙灣又係冠軍，佔三十六宗，遠遠拋離第二位得九宗嘅大潭陽明山莊。
睇番中原嘅資料，今年截至十一月十號，貝沙灣一至三期共四百三十三宗轉手，近三個月重持續增加㖭。唔怪得中記要開貝沙灣專門店啦！
公益金近年大嗌救命，話捐款額下降，所以要諗計募捐，企業捐款應該係主要收入來源。長實集團喺○三/○四年度，捐款額係公益金三大最高籌款機構之一，而且連續蟬聯五屆。集團嘅港燈、屈臣氏、長江實業（集團）有限公司、長江基建、和黃同TOM在線，合共獲得公益榮譽獎一名及公益優異獎五名。
中原集團成功將網上地圖，同住宅成交數據結合，咁喺睇地圖時，見到啲樓盤，心血來潮想睇埋物業嘅買賣資料，喺同一畫面都可以做到，夠晒方便。
今次將地圖同數據結合，甚至可以用群組方式搜尋，方便做比較。
中原中央數據部曾展良話，套系統覆蓋五萬幢一及二手樓。不過，暫時只限中原可以上到內聯網嘅行政部員工，同營業主管先可以用到，營業員同街外客就重未睇得住。
九龍塘再有豪宅招標出售，今次標售物業位於窩打老道一四七號屋地，佔地約一萬呎，可建樓面約六千呎，十二月二十二日截標。負責代理韋堅信許國偉透露，物業由黃姓投資者持有超過十年，現由有多年歷史嘅永安老人院租用，即將交吉。
由於物業位處窩打老道同森麻實道交界，步行一分鐘到地鐵站，加上處單邊路口位，外牆可作特大廣告位，位置較適合商業用途，市值較內街純住宅用地高，呎價相信可以超過一萬蚊。
近期九龍塘屋地頻頻錄得成交，十月份至今唔夠兩個月已有四宗，成交量幾乎係去年全年嘅總和，獨立屋地有價有市，係投資者都想趁勢賺番筆。
利嘉閣統計十月份舖市買賣紀錄，成交多達五百幾宗，比起九月勁升六成四，創今年三月以來新高，總值升兩成八，有三十二億元，是五月以來新高，數字大約反映九月嘅市況。
其中最大手嘅成交，係資深投資者大鴻輝興業以兩億銀，將旺角番發大廈地下至三樓賣畀Toppy老闆方鏗。呢位舖市老前輩大手出貨，多少反映舖價升到咁上下，可能要歇一會先有力再上，係時候部署出市套現。
上月大鴻輝拆售葵涌廣場時尚坊，拆售潮就即刻漫延至灣仔國泰88同尖沙嘴重慶站。最近大鴻輝轉戰全幢乙級寫字樓，唔知又會唔會吸引同業照跟。
鷹君嘅旺角地標商場朗豪坊，已經搞得如火如荼，而新地嘅觀塘創紀之城五期商場apm都不敢怠慢，不斷搞記者會，噚日主要係講重點飲食租戶cookDelibycity'super，佔用一樓兩萬三呎，有十三間人氣食肆，有啲重係首度由外國如日本引入。聽city'super董事總經理鄔嘉華講，預計人均消費四十至五十蚊。有興趣幫趁就要等明年三月至得。
新地今次除請明星嚟表演外，重會安排現場演奏南美同熱帶地區音樂，新地代理副租務總經理馮秀炎話，第日商場間中都會有呢類音樂表演，透過商場嘅大電視播放。
蘭西自問冇藝術細胞，雖然都會去吓博物館，見到啲雕塑同畫作，只覺好逼真，亦深信藝術可以改變人嘅精神面貌。對於近期本港突然出現一股藝術狂潮，自然好贊成。不過，原來背後推動嘅，係近年猛叫政府出手救樓市嘅大地產發展商。
呢班大孖沙強調，喺西九龍大搞文娛藝術，唔係想打項目嘅商住部份主意，全情投入到幾乎蝕錢都唔介意。蘭西心諗，曾司長今次好掂嘞，不如學私人市場咁，進行第二輪投標，邊個財團肯將日後嘅售樓利潤，撥最多出嚟做文娛發展，就畀佢中標，咁個藝術區第日肯定有大把錢搞活動，到時香港真係可以成功轉型，成為全球文化藝術之都，話唔定取代巴黎羅浮宮，成為藝術家朝聖地㖭。
電郵地址：
