恒指回落48點，有9點係思捷（330）配股復牌下跌所拖累，整體形勢仍然向上。
長實C輪：政府西九龍文娛藝術區項目，3財團入圍，當然有排先至知最終花落誰家。坊間估計，長實（001）與新地（016）合作嘅財團呼聲最高。兩隻地產股睇好，唔係因為估計會中標，而係個半月左右就到年底，年底例旺，火車頭地產股唔會冇份。長實C輪正選係2249，明年2月到期，輪價48仙，溢價3.4%，槓桿率14.1倍（有效9.0倍），引伸波幅24.6%。屆滿期遲1個禮拜嘅同類C輪2258，交投活躍啲，條件差唔多。嚴格計數，都係2249吸引力高出半籌。
新地C輪：新地收75.75元，跌50仙，暫時反反覆覆，最後都會向上，搵C輪炒吓。
睇數據，2165好正，明年1月尾到期，輪價78仙，溢價0.1%，槓桿率9.7倍（有效7.8倍），引伸波幅26.1%。略為有得彈嘅地方，係交投稍欠活躍，用嚟揸好過用嚟炒。冇溢價，唔怕輸溢價收窄。用嚟炒，則始終係2252，明年2月到期，輪價42.5仙，溢價3.3%，槓桿率17.8倍（有效9.9倍），引伸波幅25.1%。一日幾百宗交易，買賣唔怕有冷場。
中海油C輪：中海油（883）收4.20元，跌5仙。呢隻股票芬佬話事，上完又落，落完又上。每逢低跌，趁低位撈C輪，通常都有多少錢賺。正路對象係4563，壽命夠長，明年9月到期，輪價45仙，溢價3.7%，槓桿率9.3倍（有效5.4倍），引伸波幅28.3%。
章盛