提起Figure，第一時間你會想起日本的Medicom、香港的Gardener和鐵人兄弟，原來韓國一樣興玩Figure，製作水準更不下於港日兩地，看看元斌12吋Figure的空洞眼神、崔岷植面部表情的紋理，韓國人對Figure面相的掌握還更勝港日，碧咸、尊尼特普等外國明星不但做得活靈活現，身上比真衫還要靚的牛仔褲、恤衫同樣出色，相信唔使幾耐，Figure界將變成港、日、韓三國鼎立局面。
記者：張穎麟
日本有CWC、香港有Toycon，其實韓國一樣有自家ToyFair，今年10月更已舉辦到第5屆，雖然參展攤位只得45個，規模唔算大，一半攤位更主要發售BE@RBRICK、高達等日本最Hit玩具，但睇真韓國本地作品一樣唔少，𠵱家就嚴選5款最靚Figure畀大家過吓目，睇吓韓國出品有幾高水準！
《太極旗飄揚》破盡韓國票房紀錄，主角元斌、張東健Figure亦揚威韓國ToyFair。圖片所見只是展覽用手造版，會唔會正式發售尚未知道，但水準已出奇地高，衫上血迹、污迹深淺度勁像真，連一般人形Figure最難掌握的頭髮也似模似樣，與元斌戲中亂髮幾可亂真，認真程度絕不下於香港出名細緻的brothersworker。
《挑情寶鑑》裴勇俊Figure以搞笑作賣點，面相簡單過Barbie公仔，好彩誰是李美淑、誰是全度妍都重估到吓。不過論衣服細緻度，卻是同場Figure之冠，每層衣服用唔同顏色，穿法跟足韓國傳統服裝，絕非一般古裝Figure求其鋪塊爛布就算，連埋場景，可隨時自製裴勇俊露股一幕，一定冧盡日本師奶。
除電影外，賺人熱淚的韓劇《茶母》亦有Figure展出，咁多主角當中，最矚目的當然係靚女河知雲Figure（紅圈），不但戲服衫花、厚度跟足比例，穿起來特別貼身半點不累贅，最厲害係河知雲劇中額前的幾條劉海、幽怨表情，可再次活現Figure迷眼前。
Pose一模一樣
之前《英雄》在香港上映，「×龍」出過一套《英雄》Figure，面相唔似眼神陰濕、兵器比例唔啱長劍似刀仔、戲服似爛布撻埋一嚿，令香港Figure界勁失威。今次輪到韓國人出手，估唔到水準咁高，李連杰雙眉、Pose、戲服都神似，Body非常實淨，長時間揸劍都唔會手軟腳軟，無論擺Pose定真係玩都比「×龍」好得多。
配1:6電單車型爆
《未來戰士》阿諾舒華辛力加Figure，一身皮褸皮褲稱身，皮紋自然，唯一挑剔係面相爭啲，太多肉。身旁的1:6電單車更吸引，因為Figure揸嚟揸去都係綿羊仔，啱Blythe唔啱男性Figure，所以呢部金屬感重嘅型爆巡航電單車，Figure迷一定勁Buy。
韓國ToyFair網址：
ToyFairFigure靚就夠靚嘞，可惜得個睇字，無癮！好彩小記發現到呢個Kojun網頁，提供網上訂購手做Figure服務，有辦你睇《原罪犯》崔岷植、碧咸Figure真人一樣，唯一美中不足係要以電郵問價，唔夠方便（訂購網址：
驟眼睇重以為係真人！一看《原罪犯》崔岷植Figure那愁眉深鎖又帶點兇惡的神態，就知Figure對表情拿揑之準確；再看面上血汗、頸位脈絡，簡直同真人一模一樣，蓬鬆頭髮亦是賣點之一，不太硬的髮質也做出這種蓬鬆效果，確實難得。
除韓星外，Kojun連外國球星Figure都做埋，呢個碧咸西裝Figure雖然唔係最新SkinHead，但面相亦一絲不苟，鬚根精細夠粗豪，比一般軍士Figure鬚根易接受得多，當然他那件開胸西裝，夠挺之餘，摺袖設計更係細心特別。
香港較少公司淨做Figure衫，大部份Figure迷只可以DIY或者用其他Figure衫替換。呢個韓國網頁就做了大量Figure衫提供海外訂購。當中最煞食首選大風褸、牛仔褲等厚衣物。可能韓國天氣凍，所以他們的冬天Figure衫款式夠多之餘，剪裁亦好啱身，唔怕扣唔到鈕，（訂購網址：
