闊別英超四年嘅英格蘭同曼聯名宿「細笠」白賴仁笠臣終於返嚟同球迷見面！今次佢獲母會西布朗邀請做領隊打護級戰，但外界就唔多睇好佢，重認為佢只會陀衰家。
現年四十七歲、喺西布朗學徒出身嘅「細笠」，前日被西布朗委任為領隊兼簽約兩年半；𠵱家西布朗喺英超排尾四，受降班威脅，故「細笠」嚟緊嘅任務，就係幫球隊保住個英超席位。之但係，英國啲博彩公司就睇死佢一定幫唔到手，將西布朗降班同留班嘅賠率，分別定為一點二九倍同埋三點二五倍。
博彩公司嘅發言人費夫咁話：「踢波叻唔代表教波叻，好似熱刺嘅荷杜、伯明翰嘅法蘭斯同利物浦嘅桑拿士就係最佳例子。」「細笠」之前教米杜士堡同巴拉福特都係失敗收場，重要使咗前者成七千八百萬鎊，但最叻都係攞盃賽亞軍（一次英足總盃同兩次英聯賽盃）同英超第九名，故難怪俾人睇死。
「細笠」有「神奇隊長」之稱，我求大俠希望佢可創造神奇，幫西布朗護到級啦！
英超聯不時有球星炒車，今次就輪到曼聯嘅英格蘭新晉國腳前鋒朗尼。話說佢喺返球會練波途中，俾部重二十四噸嘅貨車撞到應，好彩佢乜事都冇，但係個荷包就重傷，要攞一大筆錢出嚟整佢部四驅車。所謂「大難不死、必有後福」，朗尼大難不死，唔知之後會唔會狂入波呢？
伊朗政府為咗表揚戴伊對該國足球作出嘅成就，決定以佢個姓名，作為德黑蘭其中一條街嘅街名。𠵱家三十五歲嘅戴伊曾踢過拜仁慕尼黑、比勒費爾德同柏林哈化三間德甲聯球會，又喺一百三十四場國際賽幫伊朗入咗九十八球，厲害成咁，所以我求大俠認為佢係當之無愧。
有關皇家馬德里想買球員嘅消息無日無之，國際米蘭經理白蘭卡就證實皇馬想斟阿祖安奴，不過就表明冇得傾。又係嘅，莫講話國米當年賣朗拿度畀皇馬時，條數一度爛尾，再交易都要諗過先，以「阿祖」咁當時得令，國米點肯放人？換轉皇馬斟發霉嘅韋利，或者重有得傾。
NBA各支球隊都有一條二十四小時嘅電話售票熱線，今季成立嘅夏洛特山貓當然唔會例外，但衰就衰在佢哋個電話號碼竟然登錯咗，重唔單只咁，原來個錯誤電話號碼竟然咁橋係一條色情熱線，結果搞到啲球迷由原來想買飛睇波，變成打電話要求色情服務，認真離譜。