多得賭王一番說話，近排熱炒的澳門賭業概念股，噚日幾乎全線勁跌，大部份都以全日最低位收市咁滯，但那邊廂就偏偏有遠東發展（035）停牌，搞配售可換股票據，同埋澳門實德（487）復牌狂升之後搞配股，真係唔到你唔服。
經紀黃話，遠展同澳門實德都係由同一間德資行做搞手，聽講認購踴躍，而且落場要貨重係有名氣嘅芬佬。
昨日復牌的澳門實德，股價單日勁升52.69％，收1.42元，但都即刻有投資者夠膽接貨。基於以上情況，小初可以夠膽講句，肯定愈來愈多二三線股都學人搞澳門概念。
好似上次經紀陳開口中，話大華國際（600）會研究投資澳門後，噚日急升奧瑪仕（959），江湖亦傳聞有人想朝呢個方向走，呢隻股向來冷門，兼且毫無往績可以參考，所以都係聽住先。
奧瑪仕噚日升37.74％，收7.3仙，成交股數2770萬股，金額167萬元。
慕容小初