立法會主席范太老公范尚德上周六喺北京不幸病逝，噚日唔少議員都好有心問候范太。煲呔曾喺立法會講西九龍文娛藝術區之前，就先向范太慰問，佢話對范尚德肝癌病逝惋惜，同時敬佩范太仍然緊守崗位、克盡己職。
不過最誇張係自由黨嘅林健鋒，范太都冇喊，鋒哥反而要「抹眼」。鋒哥自爆范生同佢係聖若瑟書院校友，有時都會同佢打高球，范生個locker重喺佢隔籬，講講吓，鋒哥無啦啦喺袋度攞條毛巾出黎「抹眼」，重抹咗幾次㖭！
相反搞開革命嘅長毛就「敵我分明」。長毛開會前同八方講，佢唔會問候范太，咁做係「偽善」，結果長毛重激親范太，結果被紅牌趕出場。
不過有啲議員真係唔多體貼，搞到范太一復工就要開夜車。立法會噚日辯咗好耐，原本可以十點休息，今日返嚟再辯論保護古蹟動議，但大部份議員都話要繼續，咁都冇辦法。
（圖）范太噚日抑壓住傷痛開會，緊守崗位。
傳真︰2623-9278
電郵︰