中方呢輪雖然冇時間理香港，任由香港人自己鬼打鬼，但係老董時日冇多，個勢日薄西山，就係人都知。
自由黨主席田北俊喺選舉之後高調支持舊黨友唐英年做第三屆特首，但係國家領導級人馬霍英東個仔霍震寰日前潑足冷水，話有意問鼎者唔好咁早表態，以免影響老董施政。
其實，連同性戀人士都一一早日行出衣櫃，想做特首，唔係想偷想搶想強姦，點解要咁有犯罪感？有興趣做就應早啲蒲頭。田少不在其位，講乜都得，唐唐做緊財司，就唔方便表態，至於煲呔，八方聽聞佢梗係看在眼裏，恨在心中，因為田少支持咗唐唐，佢嘅機會咪相對少咗。
不過，煲呔咁醒目，知呢場賽事跑長途，唔使急，佢噚日喺議事堂不避嫌同鄭大班咬耳仔，又喺度研究隻新勞力士限量版，原來煲呔同大班有同好，就係收藏靚勞，不過，大班笑自己做咗議員冇錢再入貨，煲呔就有成十幾隻喎。
（圖）煲呔（左）同大班老友鬼鬼，喺議事堂研究靚表。
傳真︰2623-9278
電郵︰