噚日八方去康泰旅行社嘅記者會，結束之後諗住鬆人，點知嘉賓港姐徐子珊突然推個蛋糕出嚟，嘩乜無綫台慶咩？原來係董事長黃士心噚日牛一，一班同事畀個驚喜佢，搞到黃生笑晒咁。
八方問佢貴庚，佢好大方咁話五十有七，重話唔會退休：「最多係退後，退到幕後，其實喺香港都畀晒啲後生搞。」佢又話會帶班同事攻打新加坡市場，因為喺嗰度發展二十幾年嘅康泰，當地規模同業績排第四：「我要喺三、四年之內排到第一，如果唔得你嚟搵我傾偈。」
點解咁有把握？佢話香港人腦筋靈活，要贏人哋唔難：「好似嗰度嘅領隊去到歐洲要搵其他公司幫手訂房，但香港領隊一個人就乜都搞掂晒。」睇嚟，黃生重有排唔得閒，好似佢自己話齋，辛苦命，鍾意做嘢。
（圖）康泰董事長黃士心（中）噚日牛一，一班同事畀個驚喜佢，叫港姐徐子珊（右）突然推個蛋糕出嚟，搞到黃生笑晒咁。
傳真︰2623-9278
電郵︰