西九龍文娛藝術區招標，政務司司長曾蔭權主持太公分豬肉儀式，一上場先將英資太古踢出局，理由係太古拒絕採用天蓬設計，將個西九龍綠化，整到好似個花園咁！
咦，乜唔係廢董話要推動「環保港」咩？成個尖沙嘴，有幾多寸綠色，將個西九龍文娛藝術區用花園包裝，有乜唔好？定係以為特區係所謂嘅中國領土，以甚麼理由，歧視英資？若然係咁，特區又有乜資格自稱「國際城市」？
不過雖然太古出局，但英國影響力仍然強大，剩番三間爭，就第一號大熱門嘅長實同新地集團「活力星國際」，背後由英國大建築家諾曼科士打揸大旗設計，個天蓬設計到一條銀蛇咁，隔住維港對岸會展中心嗰隻大水魚，形成一個龜蛇對峙格，講到風水，就梗係最符合玄學上嘅要求。
第二號「香港薈萃」，係恒基兆業擔旗。恒基兆業本喺地產方面亦經驗豐富，不過可惜，喺發展文娛藝術方面，就似乎冇乜往績。隔籬新地，都話喺馬灣搞過一個「挪亞方舟」主題公園，由教會資助，有上帝押陣，舊約聖經照住，梗係好有荷李活史詩巨片嘅《十誡》feel，文化氣息勁到爆燈，（不過後來大計撻Q，原因不明，究竟點解，神迹未能出現，似乎應該問吓耶和華嘞），老細李兆基，從來未曾聽講過佢鍾意睇白雪仙唱粵劇，或者情迷鳳凰女呀咁，會唔會喺文娛藝術方面嘅資歷淺咗少少，都當西九龍係一個五餅二魚式嘅種金聚寶盆呢？
至於三號「生利發展」，由九倉、信和及華人置業組成鑽石陣容。不過，由於呢班地產商同政府關係唔係咁好，並非煲呔杯茶，所以相信機會好微，不過冇理由唔入標啫，就算陪跑都係咁話，唔通睇住人家自動當選咩。太古慘遭煲呔曾開除，煲呔為咗向英國政府交代（佢都封過個爵士銜頭，但始終唔係人大吳邦國頒㗎嘛係咪？），一定會作出平衡，鬆番章俾英國嘅諾曼科士打，以示公允。
到時港人漫步喺科士打所設計嘅藝術天堂之中，猶如生活喺英國，精神上沐浴在幸福之中，對於促進社會和諧，好有幫助。所以一號大熱，最符合香港利益，係好有道理嘅係咪？
傳真︰2623-9278
電郵︰