關於大學學費，因為學制如果在二○○八年後有變更，於是到咗二○一一年（七年後）香港就會有二十一世紀第一屆四年制大學生，到時學費會加到五萬銀一年，讀四年畢業就係二十萬。
左丁山話唔貴，有讀者Michael話貴到難捱，連續嚟咗三次電郵同左丁山駁火，猛話貴，難頂；另外一位港大畢業生亦嚟電郵話學費略貴，可以捱得到，但會好辛苦（即係死慳死抵，睇住有錢同學去威）。嗱，全世界講親大學學費就傷感情，一定唔會有學生、家長同意加學費嘅，任何時候都冇。但要照顧到現實，大學完全免費或收取極便宜學費（相對國民人均收入而言）嘅地方，大學一定問題叢生，水平下降，除非係汶萊蘇丹畀晒錢，國家石油取之不竭。對唔住噃，香港唔係汶萊，一定要收學費，到咗二○一一年收五萬銀一年，以左丁山意見，只等於人均GDP嘅四分一左石，美國嘅私立大學學費高於每年人均GDP，州立大學學費約等於人均GDP五成至六成。大家不妨收集吓資料，睇吓香港嘅學費?人均GDP比率係唔係零舍貴過人先？我哋嘅薪俸稅稅率就真係平過好多地方嘞。
一位林太來郵話佢十幾年前讀大學，因母親已退休，便靠政府助學金與貸款完成學業，兼做補習教師，一直以自己供自己讀完大學而自豪，畢業後第一份工嘅薪水係四千六元，生活從來不容易。如今林太個女要入學讀全日制托兒所，每月交二千五百，四年（至到讀小一）共十二萬！如果二○一一年後讀一個大學學位要二十萬元，林太覺得如果仍然有助學金、貸款，用者自付，冇問題喎！