港股噚日嘅表現,可以分開3瓣嚟講。第1,大市調整完成,正式破關而上,以全日最高的13672收市,大升155點,成交更大增到214億元,上升股隻亦比下跌股隻多。今個禮拜,港股基本上係調整市,但應跌而唔跌,噚日重大升,證明市底真係好強,下禮拜個市好有機會大升,甚至會衝破14000大關阻力,挑戰更高位。
第2,國企股終於再度發力,國指收4797,大升89點,其中亦係以原料股表現最突出。中鋁(2600)、江西銅(358)、3隻鋼鐵股,同埋安徽海螺(914),升幅在3%至5%之間。噚日下晝,有消息傳中央對股市有新政策(當然係利好),之後就見到有大量買盤入市,係咁掃,大部份都以高價收市。國企今次能夠接力而上,對大市能夠突圍,好有幫助。
第3,市場資金轉而追捧國企,近期大升嘅二三線股就全部唞氣,有部份回落之勢都幾急。最礙眼係隻中信資源(1205),早段重搶到上1.92元,升成12%,但午後大戶掉轉槍頭一質,就成隻散晒,結果低收1.51元,倒跌11.7%,成交當然係賓虛咁嘅場面,接近2億股。中信資源急升,主要係春江鴨入市,而急跌亦有古仔,就係有關方面𠵱家傾緊單大「刁」,股價若升得太急,會好礙眼,所以要㩒番低佢。不過,落番1.5元水平,應係上車機會,相信唔使一兩個月,股價會見到2字頭。
中信21世紀(241)同銀建國際(171)亦都出現急升後的調整,前者跌7.2%,後者跌4.6%,急升後調整一下好正常,整固完成後,後市嘅升勢會更健康。21世紀同銀建呢兩間公司,聽聞好快會有勁料爆,大家不妨趁低入市。
國企原料股發力,有大行就推介鞍鋼(347),話佢04年度(12月年結)嘅PE7倍,而05年度更會落到5倍,目標價4.70元。鞍鋼噚日最高3.575元,收3.525元,升5.2%,係3隻鋼鐵股中力度最強者。
鞍鋼計劃收購同系公司的鐵礦場,完成後將會成為內地最具投資價值的鋼鐵公司,因為85%的原料已可自給自足;同時公司負債比率低,加息影響輕微,而第3季盈利又出乎意料咁好,噚日股價彈升,已突破頭肩底頸線阻力,短線可挑戰前高位3.90元。
郭兆誠