中銀香港係香港主要銀行，一直都有幫香港人照顧佢哋嘅財富，除咗金錢財寶之外，中銀最近重開始照顧埋人最寶貴嘅財富，就係健康。佢哋嘅慈善基金剛剛捐助東華三院，成立「東華三院中銀香港糖尿病中心」，中銀香港副總裁林炎南更加親臨主持開幕儀式。
中心嘅碑記都有講，糖尿病舊時係富貴病，因營養太好引起，𠵱家香港人生活質素改善，患呢個病就更普遍，即係話要多做運動同注意飲食攞！講小小題外話，唔知係咪做善事令人心境開朗呢，林副總裁雖然工作一直都好繁忙，但噚日都盡量滿足記者提問，不但有問必答，重先後三次停落嚟回應同一個美國議息問題，真係少啲耐性都唔得。
（圖）中銀香港副總裁林炎南（左）噚日喺香港糖尿病中心命名典禮上，同醫管局行政總裁何兆煒（右）有傾有講。
傳真︰2623-9278
電郵︰